АҞӘА, жәабран 10 – Sputnik. Ҭырқәтәыла инхо Ирфан Ахәаҷба Анкара иҭижьит 30 нызқь ажәа еидызкыло аԥсуа-аҭырқәа, аҭырқәа-аԥсуа жәар.
"2005 шықәса рзы тәанчара сцеит. Иара убри ашықәс азы Анкара, акультуратә центр аҿы аԥсуаа аԥсуа бызшәа ҳарҵара иалагеит. Аԥснынтәи дааит арҵаҩы Лиудмила Хибба, уи аҩреи аԥхьареи ҳлырҵон", - еиҭеиҳәоит иара.
Ирфан Ахәаҷба ихатәы бызшәала аҩреи аԥхьареи аниҵа ашьҭахь изымдыруаз ажәақәа иԥыло далагеит.
"Аԥсныҟа снеицыԥхьаӡа ашәҟәқәа аахәаны иаазго салагеит. Исзымдыруаз ажәақәа еидыскылон. Абасала, хәыҷ-хәыҷы ажәар аус адулара салагеит", - иҳәеит Ахәаҷба.
Ахучба иӡбеит ажәар аҭыжьра.
"Сара еилыскаауан сара сыдагьы ауадаҩрақәа змаз шыҟаз. Ажәар ззыхәарҭахаша ҟалап ҳәа иӡбаны салагеит", - иҳәоит автор.
Ажәар 650 даҟьа иҟоуп, 30 000 ажәа еиднакылоит, атираж 500 екземплиар инаӡоит.
