АҞӘА, хәажәкыра 24 – Sputnik. Аԥсны ахадас иалху Аслан Бжьаниа аинаугурациа анымҩаԥысуа арыцхә рылеиҳәеит аҩаша, хәажәкыра 24 рзы имҩаԥысыз ипресс-конференциаҟны.
"Ҳара излаҳаԥхьаӡаз ала, аинаугурациа мшаԥымза 23 рзы имҩаԥысроуп", – иҳәеит Бжьаниа.
Азакәан инақәыршәаны, ахада аҭоубашьҭаҵара ашьҭахь Аминистрцәа реилазаара аилатәара мҩаԥигоит. Аилатәараҟны рнапынҵақәа рышьҭаҵаразы аӡбра рыдыркылоит.
Абри ашьҭахь хымз рыҩнуҵҟа аԥыза-министр ҿыц ихьӡ рҳәоит. Аԥыза-министр ахада идигалоит Аминистрцәа реилазаара ҿыц.
Убри амҭа аҟынӡа уаанӡатәи аԥыза-министри егьырҭ аминистрцәеи доусы рнапынҵақәа нарыгӡалоит.
Алхратә комиссиа хада аҵыхәтәантәи аихшьалақәа ҟанаҵеит аҩаша, хәажәкыра 24 рзы. Иааидкыланы алхрақәа рҟны рыбжьы рҭиит 95109-ҩык ауааԥсыра.
Иофициалтәым адыррақәа алхрақәа анымҩаԥыс аухаҵәҟьа иӡырыргеит Аслан Бжьаниа иштаб аҟны. Урҭ инарықәыршәаны, Бжьаниа аиааира игон 58% инарықәырԥшны абжьқәа иманы. Абарҭ адыррақәа дрықәшаҳаҭхеит Адгәыр Арӡынба, иара хаҭала Аслан Бжьаниа иштаб аҟны дааны иааира идиныҳәалеит.
Иара убас шәаԥхьар ҟалоит:
- Алкаақәа ҟаҵоуп: Аслан Бжьаниа Аԥсны ахада иалхрақәа рҟны аиааира игеит
- Александр Анқәаб Аԥсны аԥыза-министрс дҟалоит
