АҞӘА, ԥхынгәы 22 - Sputnik. Роспотребнадзор аусуратә гәыԥ Аԥсны аус рулоит ԥхынгәы 23 инаркны 26-нӡа ҳәа адырра ҟаҵоуп Аминистрцәа Реилазаара асаит аҟны.
Урыстәылатәи аусбарҭа аекспертцәеи аԥснытәи рколлегацәеи еицны ирҭаауеит асасааирҭақәа, аекскурсиатә обиектқәа, ауаажәлар рыкрыфарҭақәа атәыла араионқәа рҟны.
Роспотребнадзор аспециалистцәа Аԥсныҟа раара иадҳәалоу азҵаарақәа ирылацәажәеит ахашаҽны аԥыза-министр Александр Анқәаби, атуризм аминист Ҭеимура Хышбеи асанитартә ҳақьым хада Лиудмила Скорики.
Скорик лажәақәа рыла, аделегациа иалахәхоит ԥшьҩык урыстәылатәи аекспертцәа Краснодартәи атәылаҿацә аҟны аус зуа.
