АҞӘА, жьҭаара 29 - Sputnik. Аԥсны ақәгәыӷуеит аҳаиртә баӷәаза 2023 шықәсазы аусура иалагап ҳәа иҳәеит Аԥсны ахада Аслан Бжьаниа РИА Новости аинтервиу аҭо.
"Агәра згоит апроект нагӡахап ҳәа, асовет аамҭақәа раан аиԥш Москвеи Аҟәеи рыбжьара аҳаиртә еимадара ҟалап ҳәа. Ҩба-хԥа шықәса ҳадхаларгьы уи алыршара ауеит. Иқәҿиарахон абаӷәаза аусура 2023 шықәсазы изалагар", - иҳәеит Бжьаниа.
Иара иажәақәа рыла акоронавирустә инфекциа аҟазаара апроект акыр иаԥырхагахеит.
"COVID аԥырхага ду ҟанаҵеит. Иҟоу аԥкырақәа инарыдҳәаланы уажәы аинырра уадаҩуп. Аамҭақәак рышьҭахь урҭ ҳарзыхынҳәуеит", - иҳәеит иара.
2019 шықәсазы Владислав Арӡынба ихьӡ зху жәларбжьаратәи аҳаиртә баӷәаза "Сухум" жәларбжьаратә анбантә код аиуит. Иара убасгьы иара аицтәаратә баӷәаза астатус аиуит. Уи иазыԥхьагәанаҭоит аграждантәи аҳәынҭқарратәи (арратә, аҳазалхратә, аҳәынҭқарратә маҵзура мҩаԥызго аҽа хкык) авиациа абаӷәазаҿ реицыҟазаара.
Апроект инақәыршәаны иазыԥхьагәаҭан аинвесторцәа абаӷәазатә комплекс шьаҭанкыла еиҭашьақәдыргылоит ҳәа.
Жьҭаара 28 рзы апресс-конференциаҿы, Аҟәатәи аҳаиртә баӷәаза хымԥада иаарттәуп, аха уи аҟаҵара уадаҩуп иҳәеит Аԥсны атуризм аминистр Ҭеимураз Хышба. Иазгәеиҭеит Аграждантә авиациа Жәларбжьаратәи ассоциациа Чикаго ақалақь аҿы иҟоу аҟны Владислав Арӡынба ихьӡ зху жәларбжьаратәи аҳаиртә баӷәаза "Сухум" Қырҭтәыла иатәны ашәҟәы ишҭагало. Аҳаирплан дырбаандаҩуеит аоккупациа зызу аҵакырахь иԥыруеит ҳәа, иҳәеит иара. Ари аус аҿы лассы еиҭакра бзиак ҟалап ҳәагьы дақәгәыӷуам аминистр.
Иара убас шәаԥхьар ҟалоит:
