АҞӘА, ԥхынҷкәын 9 – Sputnik. Аԥсны аекономика аминистр Кристина Озганԥҳа АУН "Амшынеиқәафымцамч" анапхгаҩы Михаил Логәуа, Аҟәатәи афымцеихшарҭатә усбарҭа аиҳабы Тимур Џьынџьал, Аҩныҵҟатәи аусқәа рминистр ихаҭыԥуаҩ Беслан Ҷкадуа алархәны ԥхынҷкәын 8 рзы аилацәажәара мҩаԥылгеит.
Аилацәажәара азкын астанциа маҷ "Аҟәа-1" аиҭашьақәыргылареи аҳҭнықалақь фымцалашарала аиқәыршәареи. АУН "Амшынеиқәафымцамч" анапхгаҩы Михаил Логәуеи, Аҟәатәи афымцеихшарҭатә усбарҭа аиҳабы Тимур Џьынџьали ирҳәеит иҟоу аҭагылазаашьаан алашара арцәара аграфик шырзышьақәмыргыло.
"Алашара ауҳашьҭуеит. Иара ахьанҭара анаабалак иҳарцәоит. Ҳәарада уи ауаа иргәаԥхом. Иацы "Колос" араион аҿы алашара ауҳашьҭит, аха аамҭа рацәа мгакәа акабель ԥхасҭахеит. Уаанӡа алашара змамыз ауаа еиҭах лашарада иқәхеит",- иҳәеит Тимур Џьынџьал.
Кристина Озганԥҳа аенергетикцәеи Аԥсны ААР аусзуҩцәеи рнапы ианылҵеит аҭҵаарақәеи ареидқәеи мҩаԥыргаларц, ацәаҳәақәа аидара хьанҭа иаҵазҵо ахархәаҩцәа аҿырхларц, избанзар астанциа маҷ аҿы иҟалаз аҩыза еиҭаҟалар алшоит.
Асеиԥш ауснагӡатәқәа Аԥсны зегьы имҩаԥгалатәуп ҳәа лҳәеит аԥыза-министр ихаҭыԥуаҩ.
Аилацәажәараҿы иазааҭгылан "Энергосбыт" аусура, ауааԥсыра рҟынтәи аԥара алхра аганахь ала хра ахьынӡамоу.
Иазгәаҭан агәаҭаратә хархәага рыҟамзаара аусура шаруадаҩуа. Михаил Логәуа иҳәеит атарифқәа рыԥсахраз аӡбра рыдыркылаанӡа асчиотчикқәа рзы апрограмма шымҩаԥгатәу.
"Ашәара зегьы ируалуп, аха амаршәа кны иазнеитәуп ари аус", - иҳәеит иара.
Аилацәажәара хыркәшо аминистр аенергетикцәа рнапы ианылҵеит амцакра амзызқәа ҭырҵаарц.
