АҞӘА, ажьырныҳәа 11 - Sputnik. Аԥсны аҭыԥ змоу аепидемиологиатә ҭагылазаашьа инадҳәаланы ашколқәеи ахәыҷбаҳчақәеи русура жәабран 15-нӡа еиҭа аанкылазарц аӡбра рыдыркылеит.
Аԥсны аҵара аминистр Инал Габлиа иазгәеиҭеит амза аҩныҵҟа аҭагылазаашьа аҽаԥсахыр ашколқәеи ахәыҷбаҳчақәеи аартхар алшоит ҳәа. Аминистр агәыӷра ааирԥшит жәабран 15 рзы аҵаратә процесс ахацыркра алшап ҳәа.
Аԥсны акоронавирустә чымазара ҿкы аламырҵәаразы иназыцҵоу аԥкрақәа ралагаларазы адҵа атәыла ахада Аслан Бжьаниа инапы аҵеиҩит абҵара 24 рзы, уи инақәыршәаны аԥкырақәа рыҿҳәара 2021 шықәса ажьырныҳәа 12 ахь инахан. Аусдҵа анапы аҵаҩын Акоординациатә штаб аӡбра шьаҭас иҟаҵаны.
Иара убас шәаԥхьар ҟалоит:
