АҞӘА, рашәара 15 – Sputnik, Асмаҭ Ҵәыџьԥҳа. Пицунда, апансионат "Самшитовая роща" аҵакыраҿы ақьафурҭа "Аԥсны" аҟны ахәра зауз руаӡәк ареанимациаҿ дышьҭоуп, иҭагылазаашьа акыр ихьанҭоуп, абас Sputnik иазааицҳаит иҩыза Витали Васенко.
Иара иажәақәа рыла ареанимациаҿ ишьҭоу ахаҵа ибаҩқәа, иҟәартәрақәа аахақәа рымоуп, аҩбатәи ахаҵа аоперациа изыруеит – хыџьараны ишьапы хәууп, иуабжьырӡы ааха амоуп.
Васенко еиҭеиҳәеит Аԥсныҟа ԥсшьара ҳәа рашәара 13 азы ишааз, апансионат "Самшитовая роща" аҿы ишаангылаз, уаанӡа Аԥсныҟа ишымаацыз.
"Еимакык рымамызт, ижәынгьы аӡәгьы имбацызт. Ахәылбыҽха акаҳуажәырҭахь инеиит рыԥсы ршьарц. Аӡәгьы иԥырхагамызт. Ихысуаз аӡӷабцәа дырхьынҳало далагеит, атапанча ҭыхны ахысра далагеит. Аӡӷабцәа ракәзар еибадыруеижьҭеи акырҵуан, ара еиқәшәеит", - еиҭеиҳәоит Васенко.
Пицунда, апансионат "Самшитовая роща" аҵакыраҿы ақьафурҭа "Аԥсны" аҟны рашәара 15, асааҭ 00:20 рзы ахысра аҭыԥ шамаз азы Пицундатәи амилициа аҷаԥшьаратә ҟәшахьы аҭел иасит. Аҭыԥ ахь инеииз аопергәыԥ ишьақәдыргылеит ахысра зуыз Аԥсны атәылауаҩ Ԥлиа Дмитри Виктор-иԥа, 1978 шықәса рзы ииз, Гәдоуҭа араион Лыхны ақыҭан инхо шиакәу.
Аԥсны ААР адыррақәа рыла Урыстәыла атәылауаа Филоиан А. А., Салимгариев Т. Н., Ԥлиа Д.В. ажәақәа анеимарк ашьҭахь Ԥлиа актәи ишьапҳәырӡыӡи ишьамхи дыриехсит, аҩбатәи – фынтә иармашьапи игәчамахи дыриехсит.
Ахәрақәа зауыз аԥхьанатә Гагратәи ахәышәтәырҭахь инаргеит, анаҩс Урыстәылаҟа ииаргеит.
Ахысра ҟазҵаз ихаҭа ибрыз ахы иаахеит. Ԥлиа изныкымкәа еиуеиԥшым азинеилагарақәа рзы аҭакԥхықәрақәа идырҵахьан. Уажәы иара Ареспубликатә хәышәтәырҭа дҭоуп.
Ахҭыс азы аматериал еизыргоит.
Арадио Sputnik аинтервиу азҭаз Аҩныҵҟатәи аусқәа рминистр Дмитри Дбар иажәақәа рыла, Ԥлиа хәышықәса инаркны аҭакра иқәырҵар ҟалоит.
Иара убас шәаԥхьар ҟалоит:
