"Аԥшьбатәи акласс аҟны стәан раԥхьаӡа аԥхьарцаҟны ахәмарра саналага. Саныхәыҷыз инаркны амузыка бзиа избон. Ҳқыҭа Хәаԥ Денис Арухаа еиҿикааз ахәыҷтәы ансамбль "Аҿарпын" салан. Иара ибзоуралоуп иахьа уажәраанӡагьы аԥхьарцаҟны сшыхәмаруа. Ашкол саналга, сҭалеит Аԥснытәи аҳәынҭқарратә акультуратә ҵараиурҭа, сыхәмаруеит еиуеиԥшым аинструментқәа рыҟны. Аха зегь реиҳа аԥхьарца абжьы ахаареи аԥшӡареи иаҳа сгәаҟны иаанхеит, агәыбылра скит. Иахьа аус зуеит Аԥснытәи аҳәынҭқарратә жәлар рмузыкатә арҳәагақәа роркестр аҟны, иасырҳәоит аԥхьарца. Ажәытәан уи амузыкатә рҳәага ҩ-рахәыцк аман, иахьазы ԥшьба рҟынӡа инаӡоит. Ҳинструментқәа ҳзыҟаиҵоит Хәаԥ ақыҭан инхо Уасил Арухаа. Аԥхьарца аҵакы уахәаԥшуазар, ԥхьаҟа ацароуп иаанаго. Уи еиҳарак рхы иадырхәон ажәыларақәа раан, ар раԥхьагылаҩ, аԥхьарца арҳәаны, аибашьцәа ргәы шьҭихуан, убасгьы ачымазаҩ игәы ихеиршҭырц азы ианадырҳәозгьы ыҟан", - лҳәеит Џьыкырԥҳа.
Жәлар рмузыка афестиваль "Аԥхьарца" Аҟәа имҩаԥысит ахәаша Аԥснытәи аҳәынҭқарратә филармониаҟны.
Инеиҵыху аиҿцәажәара шәазыӡырҩыр шәылшоит арадио Sputnik Аԥсны аефир аҟны.
