АҞӘА, хәажәкыра 23 – Sputnik. Шәача Афедералтә мҩа А-147 амҩахәҭала аныҟәара залшом адгьылҳәазара иахҟьаны ҳәа аанацҳауеит РИА Новости Амҩақәа рхылаԥшра афедералтә усбарҭа "Черноморье" апресс-маҵзура адыррақәа шьаҭас иганы.
"Хәажәкыра 22, 2020 шықәсазы автомашьынатә федералтә мҩа А–147 Џьубга – Шәача – Аԥсны аҳәаа (157 км + 500 – 158 км +500) Лазаревтәи араион аҿы адгьыл ҳәазаны амҩаду ахәҭак ықәнагеит, арӷәӷәага ҭыӡқәа ҵнашәааит, амҩа ахаҭа иақәыз акаҭран ахнаҳәеит", - ҳәа аанацҳауеит апресс-маҵзура.
Аҭыԥ аҿы амашьынақәа рыццакыра 20 км иеиҳамтәкәа рныҟәара алдыршеит. Аҭыԥ аҿы аус руеит аҟазауаа, уахь инагоуп атехника. Адгьыл аҳәазара ахымҩаԥгашьа ҭырҵаауеит аҟазауаа, амҩа аиҭашьақәыргылараз ауснагӡатәқәа мҩаԥысуеит.
"Афедералтә мҩа ахәҭа ари аҭыԥ аҿы ахыкәшарҭа амам. Афедералтә автомҩақәа реилахәыра "Черноморье" анапхгара аҭагылазаашьа ҷыда аларгалоит. Иара амҩа Шәачатәи амилаҭтә парк адгьылқәа ирыҵаркуеит. Апарк анапхгареи аусбарҭеи аконсультациақәа мҩаԥыргоит. Иаԥҵоуп аусбарҭабжьаратә комиссиа", - ҳәа аҳәоит адырраҭараҿы.
Апресс-маҵзураҿы ишырҳәаз ала, аҭагылазашьа хылаԥшра аиҭоит Шәача ахада Алексеи Копаигородски.
