АҞӘА, абҵ 10 – Спутник Аԥсны. Жәлар Реизара аиҳабы Валери Бганба, Аԥсны аҩнуҵҟатәи аусқәа Рминистр Рауль Лолуеи, аҩнуҵҟатәи аусқәа русуаҩцәа зегьи ирыдиныҳәалеит рыпрофессионалтә мшы.
Адныҳәалараҿы иануп: "Аԥсны Жәлар Реизара ахьӡала ажәлар рыԥсҭазаареи, ргәабзиареи, рҭынчреи, ус анкәха аҳәынҭқарреи ауаажәлари рыхьчара уалԥшьас изыԥхьаӡо аҩнуҵҟатәи аусқәа русуаҩцәа ишәыдаҳныҳәалоит шәыпрофессионалтә мшы.
Ҷыдала ҳрыдныҳәалоит Аԥсны Аџьынџьтәылатә еибашьра 1992-1993 шш. иалахәыз ҳаԥсадгьыл ахьчаҩцәа. Иҭахаз, аԥсуа милициа аҭоурых аҿы рыхьӡ наунагӡа иаанхоит.
Ҳауаажәлар зегь реиԥш иҳараку аҭакԥхықәра рыдҵо, Аԥсны Жәлар Реизара ирылшо зегь ҟанаҵоит аҩнуҵҟатәи аусқәа русура зырманшәалаша азакәанқәа рыдкыларазы", — ануп адныҳәаларатә шәҟәы ахәҭак.
