АҞӘА, жьҭ 29 – Sputnik, Анастасиа Никонова. Аԥсны агәабзиарахьчара аминистрра ахәыҷбаҳчақәеи, ашколқәеи акарантин рыланаҳәеит, аҵыхәтәантәи аамҭазы ахьҭачымазара ахьырацәахаз аҟнытә, иҳәеит аминистрра ахада Андзор Гоов.
"Школқәаки хәыҷбаҳчақәаки рҟны 50% еиҵаны ахәыҷқәа неиуеит ачымазара иахҟьаны, убри аҟнытә акарантин иахьа инаркны ирылаҳҳәеит", — иҳәеит Гоов.
Аминистр иажәақәа рыла, аҵаратә хыбрақәа рышҟа ахәыҷқәа рымнеира иара убас иадҳәалоуп анацәеи абацәеи рхәыҷқәа чмазаҩхар ҳәа ишәаны иахьоурмыжьуа.
"Иацы адҵа снапы аҵазыҩит аҳақьымцәа ахыҷқәа ахьышьҭоу рыҩнқәа рҟны ирхәышәтәларц азы, иара убас, аҭаацәа рхәыҷқәа рахь аҭел иасны ргәабзиара аҭагылазаашьа еилыркааларц", — азгәеиҭеит аминистр.
Ихадароу ахала аҽыхәшәра иаламгар ауп, ачымазаҩцәа аҳақьымцәа рахь инеироуп, иҳәеит Гоов.
