АҞӘА, 3 жәб — Sputnik, Саид Барганџьиа. Аҟәатәи астадион "Динамо" европатәи ашьапылампылтә еилахәыра аԥҟарақәа ирықәшәоит, Кавказ адагьы адунеи аҟны еиԥшу аргыларатә хыбрақәа ыҟаӡам, абри атәы "Аладатәи аргыларатә компаниа" адиректор хада Вадим Матуа Sputnik акорреспондент иаиҳәеит.
Иара иажәақәа рыла аҳҭнықалақьтә стадион Аԥсны аспорт аганахьала ахаҿра шьақәзыргыло ак акәны иҟалоит.
"Ауаажәлар рыбжьара агәынамӡарақәа шыҟоугьы – астадион ргылоуп! Уажәшьҭа Аԥсны раԥхьатәи ишаҭаху иргылоу, естетикатәи, ашәарҭадаратәи форма змоу ашьапылампылтә стадион шҳамоу атәы азхарҵароуп", – иҳәеит Матуа.
Матуа иажәақәа рыла, астадион "Динамо" ашьапылампылтә матчқәа рыдагьы, аспорт ахь аҿар радԥхьаларазы ицхыраагӡоу иаку комплексуп.
Аҟатәи астадион аргылара иалагеит 2012 шыәсазы. Аргылара мҩаԥнагон акционертә еилазаара "Аладатәи аргыларатә компаниа", иагьахҭынҵан 658 миллион мааҭ.
