АҞӘА, 19 фев – Sputnik, Саид Барганџьиа. Аԥсны Апарламент адепутат Кан Кәарҷиа Афонҿыцтәи аҳаԥы ахадара ахашәала аҵәахуеит ҳәа ииҳәаз зынӡа иҵакыдоуп, абри атәы аҳаԥы адиректор ихаҭыԥуаҩ Мирон Чалмаз Sputnik акорреспондент иаиҳәеит.
"Аԥсны Жәлар Реизара адепутат Кан Кәарҷиа Афон Ҿыц аҳаԥы ахадара 0,5 миллиард мааҭ аҵәахуеит ҳәа ииҳәаз ҵакыдоуп" – иҳәеит Чалмаз.
Аҳаԥы аиҳабы ихаҭыԥуаҩ иазгәеиҭеит аобиект жьҭаара инаркны аӡынтәи аихшанҵала аус шауа. "Аҳаԥы асҟак аԥара аӷьычра акәым арҳарагьы алшаӡом. Уи аҟара аԥара арҳаразы, аҳаԥы ашықәсынтәарак аус аулароуп, миллионҩык аԥсшьацәа ҳадаҳкылароуп", – азгәеиҭеит Чалмаз.
Аиндикативтә план ала шықәсык азы Афон Ҿыц аҳаԥы ахашәалахәы амҽхак 150 миллион мааҭ аҟынӡа инаӡароуп иҳәеит Чалмаз.
"Ҳара ҳганахь ала аиндикативтә план анагӡаразы иҳалшо зегьы ҟаҳҵалоит", – инаҵшьны иазгәеиҭеит Чалмаз.
Чалмаз иажәақәа рыла Афонҿыцтәи аҳаԥы официалла аҭыԥнтәи ауааԥсыра, ашколхәыҷқәа, астудентцәа, Аԥсны аџьынџьтәылатә еибашьра алахәылацәа рзы азинҷыдақәа ыҟоуп. Аҳаԥы альготтә билеҭ ахә 100 мааҭк рҟынӡа инаӡоит, егьыс абилеҭ – 500 мааҭ иркоит.
