АҞӘА, хәжәк 17 – Sputnik. Апарламенттә алхрақәа ирылагеит Израиль, урҭ ирылҵшәаны атәылаҿы аминистрцәа реилазаара ҿыц аԥҵахоит, аԥыза-министр ҿыцгьы далххоит.
5,9 миллионҩык алхыҩцәа инарзынаԥшуа абжьыҭара рылшоит 3,2 нызқь алхырҭатә ҭыԥ аҟны, урҭ атәыла зегь аҟны иаартуп асааҭ 7.00 инаркны 22.00-нӡа (8.00 – 23.00 мск).
Алхрақәа рылҵшәақәа рыла еилкаахоит апартиа "Ликуд" аԥыза Биниамин Нетаниаху аԥыза-министрс ԥшьынтәны дҟало, мамзаргьы иҭыԥ Ицхак Герцог иго.
Аблок "Асионисттә лагер" аиҳабы Ицхак Герцог иацлабуа Биниамин Нетаниаху ахара идиҵоит апалестинцәеи Израили реизыҟазаашьа аӡбараҿы алҵшәақәа ахьмаҷу, иара убас, ирантәи аиадертә программа алацәажәара ахьааникыло азы.
Кнессет 120 ҭыԥ аанкыларазы еицлабуеит 25 партиа – зықьҩыла адгылаҩцәа змоу апартиақәа реиԥш, рацәак идуум аидгылақәаеи, урҭ апарламент ахь анеираз рылшарақәа рацәам.
Алхрақәа мҩаԥысуеит апартиатә сиақәа рыла. 3,25% иреиҵамкәа абжьқәа зоуз рхы аладырхәуеит адепутаттә мандатқәа реихшараҿы. Израиль апарламент ахь алхрақәа рҭоурых аҟны иахьа уажәраанӡа иҟамлацт партиак 61, 120 рҟынтәи аанкылара алшо. Убри аҟнытә аиҳабыра шьақәыргылахон акоалициатә шьаҭа аманы.
Израиль апрезидент Рувен Ривлин хәажәкыра 25 рзы алхрақәа рылҵшәақәа рыла уи игәаанагарала еиҳа адгылара зауп ҳәа игәы иаанаго депутатк аминистрра реилазаара ашьақәыргылара инапы ианиҵоит.
