АҞӘА, хәжәк 23 — Sputnik, Бадраҟ Аҩӡба. Автомашьынақәа рномерқәа зӷьычыз ҳәа агәҩара зыдҵоу даанкылоуп. Абри атәы Sputnik акорреспондент иеиҳәеит Аҩнуҵҟатәи аусқәа Аҟәатәи аусбарҭа аиҳабы Дмитри Дбар.
"Аусҭҵаара аинтересқәа инарықәыршәаны, уи ихьӡ макьана ауаа ирылаҳҳәом, уажәы аҩнуҵҟатәи аусқәа русуаҩцәа аӷьычра иадҳәалоу аҭҵаарақәа мҩаҧыргоит", — азгәеиҭеит Дмитри Дбар.
Аҩнуҵҟатәи аусқәа Аҟәатәи аусбарҭа аиҳабы излеиҳәо ала, автомашьынақәа рномерқәа зцәырӷьычыз арныҟәцаҩцәа жәафҩык амилициахь арзаҳалқәа рҩит, аха урҭ рхыҧхьаӡара акыр еиҳазар ауеит.
Дмитри Дбар иазгәеиҭеит ацәгьоура еиуеиҧшым аверсиақәа, урҭ рахьтә автомашьынақәа рномерқәа ацәгьоурақәа рыҟаҵаразы ахархәара рзура, иара убас урҭ рыргьежьразы аномерқәа зтәу аҧара ахыршәаарц азы аӷьычра. Дбар иазгәеиҭеит Аҳәынҭавтоинспекциатә постқәа зегьы ргәы рҽынҵаны ишыҟоу иӷьычу аномерқәа рыҧшааразы.
Асабша ауха Аҟәа идырым ацәгьоуцәа ҩажәа инареиҳаны автомашьынатә номерқәа рӷьычит.
