АҞӘА, лаҵ 9 – Sputnik, Бадраҟ Аҩӡба. Аџьынџьтәыдатә еибашьра Аиааира ду амш 70 шықәса ахыҵра амш азы Аԥсны ахада ихаҭыԥуаҩ Витали Габниа, аԥыза-министр Артур Амқәаб, Жәлар Реизара ахантәаҩы Валери Бганба, апарламент адепутатцәа, Аԥсны иҟоу Урыстәыла ацҳаражәҳәаҩ Семион Григориев, ауажәларреи, ашколхәыҷқәеи Аҟәа, Ахьӡ-аԥша абаҟа амҵан ашәҭ шьыҵәрақәа шьҭарҵеит.
"Иахьатәи амш — гәырӷьаратә мшуп. 70 шықәса раԥхьа Аиааира Ду ҳгеит! Гәык-ԥсыкала ишәыдысныҳәалоит ари аныҳәа!" – лҳәеит Аџьынџьтәылатә еибашьра аветеран Татиана Галкина.
Аҟәа Ахьӡ-аԥша абаҟахьы имҩахыҵит Аџьынџьтәылатә еибашьра аветеранцәа Аԥсны араионқәа зегь рҟынтә.
"Аԥсны иҳамоуп 20-ҩык инареиҳаны Асовет Еидгыла афырхацәа. Шәышықәсала ҳхы ҳақәиҭны ҳтәылаҟны анхара азин шҳамоу адунеи иаҳардыруан", – иҳәеит Аԥсны ахада ихаҭыԥуаҩ Витали Габниа.
Аԥсны иҟоу Урыстәыла ацҳаражәҳәаҩ Семион Григориев иазгәеиҭеит аҭоурых ианакәзаалакгьы пату шақәҵалатәу.
"Даара ихадоуп иахьа аҭоурыхтә гәалашәарақәа пату рықәҵара, атәылақәа руак аҭоурых алҵшәақәа рыԥсахыр анырҭаху аамҭазы", – иҳәеит Семен Григориев.
55 нызқьҩык инареиҳаны Аԥсны атәылауаа 1941-1945 шықәсқәа рзтәи Аџьынџьтәылатә еибашьра ду афронтқәа рҟны еибашьуан, урҭ рахьынтә 17 нызқьҩык аҩныҟа изымхынҳәӡеит, 22-ҩык Аԥсны аҵеицәа Асовет Еидгыла Афырхаҵа ҳәа ахьӡ рыхҵан.
