АҞӘА, лаҵ 28 – Sputnik, Бадраҟ Аҩӡба. Ахаша, лаҵарамза 27 рзы Аԥсны аԥыза-министр Артур Амқәаби Нхыҵ-Кавказ аусқәа рзы Урыстәыла аминистр Лев Кузнецови ҩ-ганктәи аизыҟазаашьақәа ирылацәажәеит. Аиԥылараҿы иқәгылаз азҵаарақәа ируакын Аҟәеи Адлери адәыӷба абжьаҵара, иара убас аҳәаа ахысра армариара.
"Ҳара ҳрылацәажәеит Аԥсни Урыстәылеи реиқәшаҳаҭрақәа рынагӡара шцо. Иаҳҳәозар, аҳәаа ахысра армариара, уажәы уи ахысра аамҭа рацәаны иагоит", — иҳәеит Аԥсны аԥыза-министр Артур Амқәаб.
Аԥыза-министр иажәақәа рыла, аҳәаа иадҳәалоу азҵаарақәа рыӡбара ауадаҩрақәа ацуп.
"Аԥсшьацәа рхыԥхьаӡара иацлоит. Ганкахьала уи ҳгәы иаахәоит, аха даҽа ганкахьала ауадаҩрақәа ацуп. Ҳара ажәа ҳарҭеит аҳәааҽы аушьҭырҭатә кабинақәа рызегь шаартхо, аха уи азҵаарақәа зегь амыӡбар ауеит ауаа рхыԥхьаӡара ахьырацәоу иахҟьаны. Иахьа иара убас ҳалацәажәеит Аҟәеи Адлери адәыӷба абжьаҵара азҵаара", — азгәеиҭеит Амқәаб.
Аԥыза-министр далацәажәеит иара убас, ауалафахәқәеи атәанчахәқәеи рацҵара азҵаара.
"Ауалафахәқәеи атәанчахәқәеи рызҵаара аӡбара алшоит Урыстәыла Аҳәынҭқарратә Дума аҟны аиқәшаҳаҭра аратификациа ианахыслак ашьҭахь. Сара еилыскаауеит ауаа акыр ҵуеит иԥшуижьҭеи, аха адокументқәа иахәҭоу арегламент иахысроуп", — ациҵеит Амқәаб.
Нхыҵ-Кавказ аусқәа рзы Урыстәыла аминистр Лев Кузнецов дазааҭгылеит Аԥсны асоциалтә-економикатә ҿиара 2015-2017 шықәсқәа рзы анагӡара шцо атәы.
"Сколлегацәеи сареи аус адааулоит аиҳабыра уажәраанӡа ирыдыркылахьоу аиқәшаҳаҭрақәа. Раԥхьаӡа иргыланы уахь иаҵанакуеит акоммуналтә инфроструктура, абизнес маҷи, абжьаратәии ацхыраара рыҭара. Зегь реиҳа ихадароуп абарҭ азҵаарақәа рынагӡаразы азакәан аԥҵара", — иҳәеит Кузнецов.
Лев Кузнецов иажәақәа рыла сынтәа иазгәаҭоуп амҩадуқәеи, аканализациақәеи, иара убас Гагратәи абаҳчеи планла реиҭашьақәыргылара.
Уи иҳәеит, сынтәа иалагӡаны 1957 шықәса раахыс аус зуа Гагратәи афымцатә подстанциа аҟны аиҭашьақәыргыларатә усурақәа шымҩаԥгахо.
Иааидкыланы, аинвестициатә программа ала 9,3 миллиард мааҭ Аԥсныҟа иаашьҭхоит. Урҭ рахьтә 65% Аԥсны атуризм аиҭарҿира иақәхарџьхоит.
