АҞӘА, рашә 15 — Sputnik, Наала Аҩӡԥҳа. Ақалақь анапхгара апозициа еиҭакра ақәымкәа иаанхоит амшын аԥшаҳәаҟны ахәаахәҭра мап ацәкра аганахьала ҳәа ааицҳауеит Аҟәа ақалақьтә еизара ахантәаҩы Константин Ԥлиа, анаплакыҩцәеи дареи реиԥылара ашьҭахь.
"Ақалақь Ахадара адәахьтәи ахәаахәҭырҭа ҭыԥқәа амшын аԥшаҳәаҟны рыргылара мап ацәнакуеит. Анаплакыҩцәа ҳпозициа ргәаԥхо иргәамԥхо сыздырам аха еилыркааит ҳәа агәаанагара сымоуп", — иҳәеит Константин Ԥлиа.
Иара иажәақәа рыла анаплакыҩцәа, ахәаахәҭразы иахәҭаны иҟоу аԥҟаррақәа сынтәа ирықәныҟәаз, ҽааны акьанҷ аҭаԥсара иалгахоит. Иара убри адагьы ахәаахәҭратә ҭыԥқәа зегьы еицырзеиԥшу адәахьтәи аԥшра рыманы ииҟазароуп. Анаплакыҩцәа абри атәы иақәшаҳаҭуп, ҳәа иҳәоит Константин Ԥлиа.
"Анаплакыҩцәа, ахәаахәҭразы иахәҭаны иҟоу аԥҟаррақәа сынтәа ирықәныҟәаз, ҽааны акьанҷ аҭаԥсараан рхы иақәиҭаҳтәуеит, избанзар урҭ сынтәа ирыҭоу аҭыԥқәа рҟны ауп аус рыураны иахьыҟоу", — иажәақәа ирыциҵеит иара.
Иара убасгьы иазгәеиҭеит аҭыԥқәа раан азинхьчаратә органқәа аус рулоит, адырра ҳаиҭеит Константин Ԥлиа.
