АҞӘА, рашәара 17, Sputnik, Наала Аҩӡыԥҳа. Апаспорттә дыррақәа ринформациатә маӡара еиқәнаршәоит, апаспортқәа рзы адыррақәа иаку рсистема ҳәа Sputnik иазааицҳаит Аԥсны Аԥыза-министр ихаҭыԥуаҩ Дмитри Сериков.
"Иҟоуп агәаанагара, Урыстәылатәи Афедерациа асистемаҟны иҟоу аинформациа зегьы адырыр алшоит ҳәа, избанзар асистема урыстәылатәи аган ауп иаззырхио азы.
Усеиԥш ҳәарада иалшоит, ҳара "Гознак" ахаҭарнакцәа иаарту аканал рзеиҿаҳкаар, аха ҳара усеиԥш аҟаҵара ҳгәы иҭам. Ҳара иҳалшоит иара аизакра. Атәым ҟазацәагьы иара амаҵ азырурым, асистема амаҵзура мҩаԥаагоит иара аҩныҵҟа» — иҳәеит Д. Сериков.
Иара убасгьы иаҳзеиҭеиҳәеит "Гознаки" аҭыԥантәи IT-еилахәырақәеи ражәалагала шҭиҵааз. «Гознак» иатехникатә дҵаны иҟоуп иҿырԥшратәу асертификациа зызуу аусура – иҳәеит иара.
Сериков иажәақәа рыла, ажәалагала иалнаршоит акомпиутортә программа аҩра, ари иаанагом шьаҿа-шьаҿала апроект зегьы аларҵәара.
"Дара иҳадыргылоит апрограмма аҩра. Сара сгәы иаанагоит апрограмма ҩымз рылагьы иуҩыр шалшо, аха иарбанызаалак апрограмматә аалыҵ агәаҭара иахыжьтәуп. Иарбанызаалак апрограмма аусура иалаургаргьы аусура еиԥҟьар алшоит. Агәаҭаразы аамҭа аҭахуп, иҟалап шықәсыбжак рҟынӡа. Уи апрограмма ииашыны иахьынӡеиқәыршәо иадҳәалоуп. Ари имариоу усым. Сара сшахәаԥшуала аинформациатә шәарҭадара ахаҟны иҳаргылароуп. Иҟоуп адәахьынтәи асистема азнеира алзмыршо амыругақәа – уи асисттема аизакроуп", — иҳәеит Д. Сериков.
"Гознак" иҳаднагало асистема апрограмма-аппараттә комплекс акәны иҟоуп, азгәеиҭеит иара.
"Софт, ари апрограмматә еиқәыршәара, аинформациа зегьы ахьыҵәаххоу ацхыраарала иалыршахоит апаспортқәа рыҭара, уи апроцесс ахылаԥшра, аинформациа ахылаԥшра. Софт иара ахала аус азуӡом, иара аус ауеит "жезл" захьӡу акомпиуторқәеи асервери рҟны", — иҳәеит Д. Сериков.
Апаспортқәа рҭыжьраз аилаӡара ахәԥса иартәоит 40 миллион мааҭ. 15 миллион мааҭ артәоит – апрограмматә еиқәыршәара ахаҭа, 25 миллион мааҭ – Аԥсны апаспорттә столқәа рзы иҷыдоу ахархәагақәа раахәареи рықәыргылареи.
