АҞӘА, рашә 17 – Sputnik, Нала Аҩӡыԥҳа. Иеицырдыруа амузыкант, Ефрем Ешба имоҭа Виктор Абрамиани апианино арҳәаҩы Наталиа Богдановои Ражьден Гәынба ихьӡ зху Аԥснытәи Аҳәынҭқарратә филармониаҟны рашәара 17 рзы аклассикатә музыка аконцерт мҩаԥыргеит.
Виктор Абрамиан ишеиҭеиҳәаз ала, уаанӡатәи арии асценаҟны иқәгылара мҩаԥысуан 34-шықәса раԥхьа. Москватәи аконсерваториа астудент Виктор Абрамиан Аԥсны Аҳәынҭқарратә симфониатә оркестр далахәылан.
"Аԥсуа публика рҿаԥхьа ахәмарра уадаҩуп избанзар сара стәқәа рҿаԥхьа сықәгылароуп", — иҳәеит амузыкант.
Аконцерттә усура адагьы Виктор Абрамиан Москватәи аконсерваториаҟны иҟоу амузыкатә школ дарҵаҩуп. Амузыкант ипланқәа рҟны иҟоуп аԥснытәии москватәии арҵаҩцәа русеицура аиҿкаара.
"Сара ажәалагала ҟасҵеит ҳарҵаҩцәа рыбжьара аусеицура шьақәгыларц, ахәыҷқәа, аҿар ацхыраара раҳҭаларц. Спиваков ифонди ҳареи иҳалшоит Москватәи амузыкантцәа арахь раагара, аконцертқәа реиҿкаара. Аԥсны аҿаԥхьа ари сара исуалуп ҳәа иазысыԥхьаӡоит» — иҳәеит В. Абрамиан.
Наталиа Богданова Аҟәа раԥхьаӡа акәны дықәгылеит. Апианино арҳәаҩы лажәақәа рыла лара дреигәырӷьоит ашьақәгылара иаҿу Аԥсни Урыстәылеи реимадарақәа.
"Аа-шықәса раԥхьа сара Пицунда сықәгылан. Сара ирацәаны агострольқәа мҩаԥызгоит. Сара среигәырӷьоит ашьақәгылара иаҿу Аԥсни Урыстәылеи реимадарақәа", — лҳәеит лара.
Аҳәынҭқарратә камертә оркестр адирижиор хада Давид Терзиан иазгәеиҭеит: "Зыӡыҩҩрык иаҳасабала сара иахьа агәахәа ду соуит. Аскрипкарҳәаҩы изы Бах и-Чакона визиттә карточкак иеиԥшуп, имузыка зегьы азы паспортк аҳасабала иҟоуп. Уи ансаҳа нахыс еилыскааит аскрипкарҳәаҩы иҩаӡара зеиԥшраз".
Аконцерт аҟны Бах, Дворжак, Сен-Санс, Шопен, Дебиусси, Креислер рырҿиамҭақәа арҳәан.
Виктор Абрамиан – ауаажәларратә усзуҩы Ефрем Ешба иԥҳа аиҵбы лыҷкәын иоуп. Далгеит П. Чаиковски ихьӡ зху Москватәи аҳәынҭқарратә консерваториа 1980 шықәса рзы, аспирантура – 1983 шықәсазы.
Солистк иаҳасабала асимфониатәи акамертәи оркестрқәа дрыцықәгылоит (Британиа Ду, Урыстәыла, Украина). 1995 шықәса инаркны 2005 шықәсанӡа Москватәи ааконсерваториа дарҵаҩын. 2003 шықәса инаркны Абрамиан Москватәи аконсерваториаҟны иҟоу амузыкатә школ дарҵаҩуп. Иара убасгьы Маимонида ихьӡ зху академиа дарҵаҩуп. Ақалақьқәа жәпакы рҟны амастер-классқәа мҩаԥигоит: Горовиц игәалашәара Афонд Академиаҟны, "Реин аҟны амузыка" Акдемааҟны, "Регенсбург аҟны амузыка" Академиаҿы, Туниси Мексикеи руниверситетқәа рҟны.
