АҞӘА, рашә 25 — Sputnik, Анжелика Бениаԥҳа. Акультуреи аҭоурых-культуратә ҭынхақәа рыхьчареи аминистр Ельвира Арсалиаԥҳа Фредерик Диубуа де Монпере игравиура Амилаҭтә галереиа адиректор Сурам Сақаниа илҭеит.
Ельвира Арсалиаԥҳа иазгәалҭеит агравиура 19-тәи ашәышықәса ишаҵанакуа, аҵыхәтәантәи аамҭақәа рзы акартинатә галереиа адунеитә сахьаркыратә хазынарақәа рыла ахарҭәаара ибзиоу традицианы ишышьақәгылаз.
"Аҵыхәтәантәи аамҭақәа рзы акартинатә галереиа адунеитә сахьаркыратә хазынарақәа рыла ахарҭәаара ибзиоу традицианы ишьақәгылеит. Урҭ реиҳарак ахатәы коллекциақәа рҟынтәи ауп ҳамҭас ишыҟарҵо. Сара сеигәырӷьоит 19-тәи ашәышықәса иаҵанакуа аусумҭа иахьа агалереиа аколлекциа иахьаланагалаз. Ҳмилаҭтә галереиа иақәнаганы иҟоу арежим ала аус азуам иахәҭаны иҟоу ахыбра ахьыҟам азы аха аколлекциа ахаҭәаара иаҿуп", — лҳәеит лара.
Амилаҭтә галереиа атәыла аиҳабыра ҭабуп ҳәа реиҳәеит.
"Еицырдыруа аныҟәаҩ, агеограф, аҭҵааҩы, асахьаҭыхҩы Фредерик Диубуа де Монпере иусумҭа ҳара ҳзы ахә кыр иҳаракны ишьоуп. Иара аинтерес аҵоуп аҟазара абзиабаҩцәа рыдагьы аҭҵааҩцәа рызгьы",- азгәеиҭеит Сурам Сақаниа.
Агравиура "Vues D'Abkhasie" Аԥсны АХада ҳамҭас ииҭеит Урыстәылатәи Афедерациа Апрезидент Владимир Путин.
Агравиура "Vues D'Abkhasie" ианыԥшуеит "Алада-мрагыларала Гагра асахьа", "Анаҟәаԥиеи Ԥсырӡхеи", "Сухум-кале", "Гасан-беи Кьылашәыртәи иҩны»" "Кьылашәыри Аԥсуа ҭӡы алагамҭеи" рсахьақәа.
