АҞӘА, ԥхынгәы 9 — Sputnik, Саид Барганџьиа. Ахаша, ԥхынгәы 9 рзы, Аԥсны Аҳәынҭқарра Аминистрцәа Реилазаара еицҿакны рыбжьы рҭиит Алхас Кәарацхьелиа Акультуреи аҭоурыхтә ҭынхақәа рыхьчареи рзы аминистр лхаҭыԥуаҩыс иҟаҵаразы.
Акультуреи аҭоурыхтә ҭынхақәа рыхьчареи рзы аминистр Ельвира Арсалиаԥҳа лажәақәа рыла, аусҳәарҭа аусураҟны аменеџьер-ҿа даҭахны иҟоуп.
"2014 шықәса жьҭаарамзазы Акультура аминистрра Акультуреи аҭоурыхтә ҭынхақәа рыхьчареи рзы аминистрра ҳәа еиҭеиҿкаан. Аминистр актәи лхаҭыԥуаҩ Баҭал Кәабахьиа аҭоурых-культуратә ҭынхақәа рызҵаароуп инапы злаку. Дҳамоуп апроектқәа ирхылаԥшу адепартамент аиҳабы, аха ҳара ҳусура иҳаилнаркааит административтә напынҵақәа ирыҵагылаша ауаҩгьы дшаҳҭахыз", — лҳәеит Арсалиаԥҳа.
Ареспублика Аԥыза-министр Артур Амқәаб Кәарацхьелиа диазҵааит "уабанӡазыхиоу Акультуреи аҭоурыхтә ҭынхақәа рыхьчареи рзы аминистр лхаҭыԥуаҩыс аҟазаара?" ҳәа.
"Сгәы иаанагоит исышәҭаз агәрагара саԥсахартә аус зуп ҳәа, сара ибзианы еилыскаауеит исыду аҭакԥхықәра аҩаӡара. Исылшо зегь ҟасҵоит стәылазы", — ҳәа аҭак ҟаиҵеит Алхас Кәарацхьелиа.
Алхас Кәарацхьелиа диит 1983 шықәса, ԥхынгәы 26 рзы, Новороссииск ақалақь аҟны. 2000 шықәса рзы далгеит Баграт Шьынқәба ихьӡ зху Аҟәатәи аԥсуа школ. Ашкол даналга дҭалеит Шәачатәи атуризми акурорттә уси рзы аҳәынҭқарратә университет. Далгеит қәҿиарала 2005 шықәса рзы. 2007-2009 шықәсқәа рзы аррамаҵзура дахысуан. 2015 шықәса инаркны аус иуан Акультуреи аҭоурыхтә ҭынхақәа рыхьчареи рзы аминистр лыцхырааҩыс.
