АҞӘА, ԥхынгәы 13 – Sputnik, Бадраҟ Аҩӡба. Аԥсны акультуреи аҭоурых-культуратә ҭынха ахьчареи рминистр Ельвира Арсалиаԥҳа лыӡбарала Светлана Кәарсаиаԥҳа Дырмит Гәлиа илитературатә-мемориалтә музеи аиҳабыс дҟаҵоуп.
"Ҳәарада, амемориалтә музеи даара арҿыцра аҭахуп, аиҭашьақәыргыларатә усқәа мҩаԥгатәуп. Акыр шықәса ҵуеит амузеи акгьы адрымҵеижьҭеи, ацхыраара аимоуижьҭеи", — лҳәеит Кәарсаиаԥҳа.
Светлана Кәарсаиаԥҳа Дырмит Гәлиа илитературатә-мемориалтә музеи аусура ашьақәыргылашьа далацәажәеит.
"Аусура ҩба-хԥа хырхарҭа рыла ҳалагоит: аҭҵаарадыраатә хырхарҭа, аиԥыларақәа, алитературатә хәылԥазқәа рымҩаԥгара уҳәа. Дырмит Гәлиа иҭынха аиқәырхара аус аҿы иҟаҵоу рацәоуп, ҳара уи иҵегь иацаҳҵарц ҳгәы иҭоуп", — азгәалҭеит уи.
Дырмит Гәлиа раԥхьаӡатәи аԥсуа театр ашьақәыргылаҩ ахьиакәу азы еиуеиԥшым ауснагӡатәқәа мҩаԥаҳгоит уи аганахь алагьы, лҳәеит Кәарсаиаԥҳа.
"Дырмит Гәлиа аԥсуа театр дашьаҭаркҩуп, еиҭагоу атеатр аԥызҵаз иоуп. Убри азыҳәа ҳгәы иҭоуп убри аганахь ала аусмҩаԥгатәқәа реиҿкаара. Дырмит Гәлиа алитература амацара акәымкәа аԥсуа культураҿы иааидкыланы иҟаиҵахьоу хырхарҭа-хырхарҭала аӡыргара ҳгәы иҭоуп", — лҳәеит амузеи аиҳаб ҿыц.
Светлана Кәарсаиаԥҳа – аҟазараҭҵааратә наукақәа дыркандидатуп, джурналиступ, Аԥсны акультура зҽаԥсазтәыз усуаҩуп, 2015 шықәсазы иланашьан аҳәынҭқарратә орден "Ахьӡ-Аԥша" III аҩаӡара. Аус луеит Дырмит Гәлиа ихьӡ зху Аԥсуаҭҵааратә институт аҿы.
