АҞӘА, нанҳәа 7 — Sputnik, Бадраҟ Аҩӡба. Ицшьаҭаркыҩцәа узқәымгәыӷша лахәылацәоуп ҳәа ахара рыдиҵарц азы аԥхасҭа зҭоу "Континент-М" амыругақәа рсахьақәа рцәыргара иара Игор Варов ихаҭа иоуп еиҿызкааз ҳәа Sputnik акорреспондент изеиҭеиҳәеит Ахәаахәҭратә комплекс "Континент-М" ацшьаҭаркҩы Саид Ҷанба.
"Ҳара ҳхы ҳаӷаӡам, ҳмазареи ҳнаплаки ҳраӷаны ҳаҟаӡам. Сара Варов иасҳәар сылшоит – уцшьаҭаркыҩцәа рҿаԥхьа иуқәуу, 26 миллион инаӡоу ауал ушәароуп ҳәа. Ауаа ырԥаршеины раарԥшра ацынхәрас, ирхарам рхаҵара ацынхәрас ус ҟаиҵар еиҳа еиӷьын", — азгәеиҭеит Ҷанба.
Уаанӡа АК "Континент-М" ацшьаҭаркҩы Игор Варов иҳәеит Гагра араион Ахадара "Континент-М" иатәыз амыругақәа зегьы дәылганы икарыжьит ҳәа.
Гагра араион Ахада Беслан Барцыц иакәзар иазгәеиҭеит ақалақь аиҳабыра "Континент-М" амазара ықәган агара зынӡаскгьы ишалаҟьышьым. Барцыц иара убасгьы иҳәеит амазара ақәгараан аӡбарҭатә уснагӡаҩцәа шыҟаз иара убасгьы иара аилазаара ахаҭа алахәылацәагьы. Амазара ықәызгаз дара ашьаҭаркыҩцәа шракәу.
Арбитраж ӡбарҭа аӡбрала аилак "Континент-М" аусура ахьымҩаԥнагоз ахыбраҟынтә амыругақәа (авитринақәа, астеллажқәа, архьшәашәагатә камерақәа) ықәыргараны ишьақәыргылан.
