АҞӘА, нанҳәа 11 — Sputnik, Бадраҟ Аҩӡба. "Аҧсны-ҿа" захьӡу арра-патриоттә лагер ҩаҧысуеит Кәыдрытәи аиҩхааҟны нанҳәа 17 инаркны 25 рҟынӡа ҳәа ҳкорреспондент изеиҭеихәеит аҿартә политика азҵаарақәа рзы аҳәынҭқарратә Еилакы ахантәаҩы Алиас Аҩӡба.
Аҩӡба иҳәеит арра-патриоттә лагер "Аҧсны-ҿа" иалахәхоит 17 шықәса инаркны 25 шықәса рҟынӡа зхыҵуа 150-ҩык аҿар ҳәа.
"Жәымшы ирҭагӡаны иалыршахоит иаарласны аруаҩ-ҿа икурс ахысра. Аҷкәынцәа анапышьашәалатә, атактикатә, аморал-ҧсихологиатә ҵара иахыгахоит. Алагер мҩаҧысуанаҵы аҷкәынцәа аус рыдырулалоит Аҧснытәии Урыстәылатәии аҧышәа змоу азыҟаҵаҩцәа", — иҳәеит Аҩӡба.
Алиас Аҩӡба инаҵшьны иазгәеиҭеит алагер аҿы аҟазааразы алхрақәа активла ишымҩаҧысуаз.
"Ҳара иҳауит 80 рҟыӡа рзаҳал, макьаназы араионқәагьы иаҳзаарышьҭроуп асиақәа. Урҭ еиҳарак ақыҭатәи аҿар ракәхоит", — иҳәеит Аҩӡба.
Аҳәынҭеилакы ахантәаҩы иажәақәа рыла алагер алахәылацәа ироуеит алшара иара убасгьы Аҧсны аҭоурыхи аҧсуа етикети рганахьала рдыррақәа реизырҳаразы.
"Аҿар еихшахоит аҟәшақәеи, аҵаҟәшақәеи, авзводқәеи аротақәеи ҳәа. Имҩаҧгахоит арра-спорттә хәмарра. Иаиааиуа аҧхьахәқәа ранашьахоит", — ҳәа азгәеиҭеит Аҩӡба.
Абар, сынтәа, ҧшьышықәсоуп аҿартә политика азҵаарақәа рзы Аилаки Атәылахьчара аминистрреи еицымҩаҧыргоижьҭеи асеиҧш иҟоу арра-патриоттә лагер.
