АҞӘА, нанҳәа 14 — Sputnik. Аԥсуа жәлар риааира адунеи зегьы ианарбеит ажәлар ахьыԥшымреи ахақәиҭреи рахь ирымоу абзиабара иарбанызаалак танкк шазымиааиуа ҳәа аҳәоит Аԥсны Ахада Рауль Ҳаџьымба ихьӡала Леонид Тибилов иааишьҭыз аацҳамҭаҟны. Абри атәы аанацҳауеит Аахыҵ Уаԥстәыла Sputnik.
"Абри амш аҽны, аихамҩа ҳахьчоит ҳәа 23 шықәса раԥхьа Аԥсны аҵакырадгьыл иалалеит Қырҭтәыла ар, бџьарла еиқәныхны иҟаз ақырҭуа неформалцәа", — ҳәа азгәаҭоуп Тибилов иаацҳамҭаҟны.
Аахыҵ Уаԥстәыла Ахада иазгәеиҭеит Аԥсуа жәлар, аҳәынҭқарратәи ауаажәларратәи усзуҩ Виачеслав Арӡынба инапхгарала рыԥсадгьыл ахьчаразы иаӡәыкны ишгылаз.
"Абас иалагеит 413 мши-ҵхи ицоз Аԥсны жәлар Рџьынџьтәылатә еибашьра. Аешьаратә жәлар риааира хьӡырҳәага аҽазныкгьы адунеи зегьы ианарбеит атанкқәеи апушкақәеи ажәлар ргәамч ишазымиааиуа", — азгәеиҭеит Тибилов.
Иара убасгьы иазгәеиҭеит Аахыҵ Уаԥстәылаа рашьцәа аԥсуаа зықәшәаз арыцҳара иаҵагыланы, хатәгәаԥхарала еибашьра ишааз.
"Аԥсны ахьчаҩцәа ргәаларшәо, иҭахаз Аахыҵ Уаԥстәылатәи аибашьцәа ахьҭахаз аҭыԥқәа рҟны ашәҭшьыҵәрақәа шьҭарҵашт, иазгәарҭашт Аахыҵ Уаԥстәылаа рашьцәа аԥсуаа зықәшәаз арыцҳара иаҵагыланы, хатәгәаԥхарала еибашьра ишааз раԥхьатәиқәа ирыланы. Быжьҩыуаак цхинвалаа рыԥсҭазаарақәа Аԥсны ахақәиҭреи ахьыԥшымреи ирыхҭнырҵеит. Наӡаӡа ҳгәалашәара рыцзааит афырхацәа!" — аҳәоит аацҳамҭаҟны.
Леонид Тибилов аԥсуа жәлар ирзеиӷьеишьеит аҭынчреи анасыԥи, Аԥсны – аизҳазыӷьара.
