АҞӘА, нанҳәа 19 — Sputnik, Анжелика Бениаԥҳа. Аҵыхәтәантәи ахәышықәса рыҩныҵҟа Аԥсны аҵакырадгьыл аҟны шәкы рҟынӡа ахьӡ ҿыцқәа цәырҵит ҳәа ҳкорреспондент илеиҳәеит Аԥсуа дгьылҭҵааҩцәа реилазаара апрезидент Леуард Барцыц.
"Аҵыхәтәантәи аамҭазы Аԥсны аҭааҩцәа хаԥышәала ахьӡқәа рырҭоит аҭыԥқәа, аӡиасқәа, ашьхақәа. Убас, аҵыхәтәантәи ахәышықәса рыҩныҵҟа Аԥсны аҵакырадгьыл аҟны шәкы рҟынӡа ахьӡ ҿыцқәа цәырҵит. Ари акрызҵазкуа проблемоуп", — иҳәеит иара.
Ари апроблема Аԥсны аетнокультура аҿиара аруадаҩуеит ҳәа азиԥхьаӡоит иара.
"Иҟан аамҭақәа, ақырҭцәа дара ишырҭахыз, аиҳарак ихҵәаны иаақәаз, иахьынтәааз ахьӡқәа аҭыԥантәиқәа ианрырҭоз. Аха уи аамҭа ииасхьеит, иахьа ахьӡқәа рыԥсахуеит Аԥсны аетнокультура чыдарақәа ахьырзымдыруа азы. Уи, ҳәарада, иаԥнаҵоит Аԥсны аетнографиазы ауадаҩрақәа. Ҳәарада ҳетнокультура аҿиарагьы аруадаҩуеит. Аԥсны атопонимика, ари ҳара ҳқьабз ауп, ҳкультуроуп. Ҳҵас ауп. Арҭ зегьы ҳара иҳаҳьчалар ауп", — иҳәеит Барцыц.
Иара игәаанагарала атопонимика ареицакра зыхҟьо Аԥсны адгьылҭҵаара ишахәҭоу иахьӡыргам ауп.
"Ҳара иазхо ахсаалақәа ҳамам, иҳамам амаршрут арбаразы иахәҭоу аныҟәарамҩақәҵагақәа, аекскурсиамҩаԥгаҩцәа иахьынӡахәҭоу аинформациа ҟарҵом. Ари зегь зыхҟьо иахәҭоу алитература аҟамзаароуп", — азгәеиҭеит Барцыц.
Иара иажәақәа рыла, хыхь иарбоу азҵаарақәа рыӡбаразы Аԥсны Аҭҵаарадыррақәа ракадемиа имҩаԥнагеит аилатәара. Уаҟа иазыӡбан атәыла Аиҳабыра рахь абри азҵаара цәыргазарц.
"Ихадоу усдҵаны иҟоу ииашаны атопонимика аиқәыршәароуп. Иҟоуп џьара-џьара, ҭыԥк ахьӡқәа ҩба-хԥа анамоу. Убас аан анапаҟны иумазароуп ииашоу аматериал", — иҳәеит Барцыц.
Иара убас хазы иаликааит Аԥсны ашколқәа рҟны адгьылҭҵаара иазку алитература бзиа аҟамзаара.
"Аԥсны аҵакырадгьыл, иара амшынԥшаҳәа акы иалаҩашьом. Хыхь иасырбаз апроблемақәа рыӡбразы иахәҭоуп адгьылҭҵаара аҿиара, аԥсуа етнос рыхдырраҟны уи аҵакы аилкаара аиура", — азгәеиҭеит Барцыц.
Уаанӡа иара Sputnik адырра аиҭахьан Аԥснытәи агеографиатә еилазаара ареспублика атопонимқәа рышьақәыргылара, уи аганахь ала азанаҭуаа ашәҟәҭаҩра ишаҿу.
