"Москва аҩны" аҟны Аԥсныи Урыстәылеи реизыҟазаашьа иалацәажәеит

© Sputnik, Бадрак Авидзба"Москва аҩны" аҟны Аԥсныи Урыстәылеи реизыҟазаашьа иалацәажәеит
Москва аҩны аҟны Аԥсныи Урыстәылеи реизыҟазаашьа иалацәажәеит - Sputnik Аҧсны
Анапаҵаҩра
НовостиTelegram
Аԥсни Урыстәылеи рҳәынҭқаррабжьаратә еизыҟазаашьақәа ирылацәажәеит имҩаԥысыз астол гьежь аҟны.

АҞӘА, нанҳәа 21 — Sputnik, Бадраҟ Аҩӡба. Ахәаша, нанҳәа 21 рзы, "Москва аҩны" аҟны имҩаԥысыз астол гьежь "Аԥсны Аҳәынҭқарра ахьыԥшымра азхаҵара 7 шықәса ахыҵра" аҳәаақәа ирҭагӡаны Аԥснаи Урыстәылеи реизыҟазаашьа иалацәажәеит.

"Аҭоурых аганахьала быжь-шықәса зынӡа имаҷӡоуп, аха ҳара ари аамҭа иалагӡаны амҩа ду ҳанысит. Арҭ ашықәсқәа рыла ҳара ҳахысит еиуеиԥшым аетапқәа, уажәы ҳазҭагылоу аамҭа зынӡа иҿыцӡоуп", — иҳәеит Аԥсны иҟоу Урыстәыла Ацҳаражәҳәаҩ Семион Григориев.

Астол гьежь аҟны дықәгылауа аԥыза-министр актәи ихаҭыԥуаҩ Шамиль Аӡынба инаҵшьны иазгәеиҭеит Аԥсны ахьыԥшымра азхаҵара Амш ареспубликазы аҵак ду шамоу.

"Зқьышықәсалатәи ҳҳәынҭқарра аҭоурых еиуеиԥшым ахҭысқәа ахнагахьеит. Сгәы иаанагоит урҭ рыгәҭа нанҳәа 26 иааннакыло аҭыԥгьы акыр аҵакы дууп ҳәа. Нанҳәа 26 рзы иӡбан аԥсуа ҳәынҭқарра аҟазаареи аҟамзаареи азҵаара", — иҳәеит Аӡынба.

Атәыла Ахада иабжьагаҩ Владимир Занҭариа иазгәеиҭеит Аԥсны азхаҵара ажәлар рхатәҳәаақәҵаразы рықәԥара иалҵшәаны иҟалеит ҳәа.

"Азхаҵара алыршахеит избанзар, раԥхьа иргыланы аԥсуа жәлар акыр шәышықәса ретнокультуратә акзааразы иқәԥон, рполитикатә хатәхалаҳәаақәҵара иашьҭан", — азгәеиҭеит иара.

Аиԥылараҟны ирылацәажәан ҳтәылақәа реимадарақәеи реизыҟазаашьақәеи шырҭбаалатәу.

"Сара исҭахын Аԥсни Урыстәылеи рыбжьара аекономикатә еимадарақәа иҵегь еизҳар. Сара исҭахуп ахәылбыҽхатәи ажәабжьқәа рҟны ирҳәар – Саратовтәи аобласт Очамчыра араион аҟны ахәырма аархәеит ҳәа, аҭакс акартоши аҷырхали нарышьҭит Аԥсныҟа ҳәа", — азгәалҭеит Аԥсны ауаажәларратә палата алахәыла Надежда Венедиктова.

Астол гьежь аҟны иара убасгьы иалацәажәеит аинырразы еиҳа ишаҭаху ауаажәларратә еиҿкаарақәа рыбжьара аимадарақәа раԥҵара.

Аиԥылара иалахәын Аԥсны аԥыза-министр актәи ихаҭыԥуаҩ Шамиль Аӡынба, атәыла ахада иабжьагаҩ Владимир Занҭариа, Аԥсны иҟоу Урыстәыла Ацҳаражәҳәаҩ Семион Григориев, Аминистрцәа Реилазаара алахәылацәа, аҵарауаа, аурыс хеидкылақәа рхаҭарнакцәа, ареспублика аҳәынҭқарратәи ауаажәларратәи еилазаарақәа рлахәылацәа.

Аиԥылара аурыс хеидкылақәа Ркоординациатә хеилаки Аԥсны иҟоу аурыс тәылауааи, Урыстәыла Ацҳаражәҳәарҭеи, "Москва аҩни", "Россатрудничество" аусзуҩцәеи еиҿыркааит.

Ажәабжьқәа зегьы
0