АҞӘА, цәыббра 21 – Sputnik, Бадраҟ Аҩӡба. Аҟәатәи ареалтә училишьче аԥҵоижьҭеи 111 шықәса ҵуеит.
"Аҟәатәи ареалтә училишьче аԥҵара Аԥсны зегь азы усҟантәи аамҭазы аҵак ду аман. Усҟантәи аинтелллигенциа, Симон Басариа раԥхьа днаргыланы, ибзиаӡаны еилыркаауан ареспублика аԥеиԥш иара иқәынхо ажәлар рҵара-дырра ишахьыԥшыз" — иҳәеит ҳкорреспондент диҿцәажәо абызшәадырҩы Леонид Саманба.
Аҵарауаҩ иазгәеиҭеит Аҟәатәи ареалтә училишьче аԥҵара Аԥсны анаукеи аҵареи ирышьаҭаны ишыҟалаз.
"Асовет аамҭа аҟынӡатәи аԥсуа интеллигенциа абраҟа акәын иахьрызҳауаз", — ҳәа ациҵеит Саманба.
Аҟәатәи ареалтә училишьче аҟны аамҭа-аамҭала аус руан Дырмит Гәлиа, Андреи Ҷоҷуа, Виктор Стражев, Александр Добровольски. Иароуп изылгаз Михаил Лакербаи, Семион Ашәхәаҵаа.
1921 шықәса рзы аучилишьче аиндустриалтә техникум ҳәа ишьақәыргылан. 1999 шықәса рзы – Аҟәатәи аҳәынҭқарратә колледж ҳәа.
Иахьа араҟа иазыҟарҵоит еиуеиԥшым азанааҭқәа зауша аҿар.
Аҟәатәи ареалтә училишьче аартын 1904 шықәса рзы аимператор Николаи II Иқәҵарала.
