АҞӘА, абҵара 4, Sputnik, Наала Аҩӡыԥҳа. Аԥсны Жәлар Реизара адепутатцәа ирыдыркылеит "Акоррупциа аҿагыларазы" Азакәан. Азакәан рыдыркыларц азы рыбжьы рҭиит 27-ҩык адепутатцәа.
Ирыдыркылаз Азакәан аҳәынҭқарра аҿиаразы аҵак ду аманы иҟоуп иҳәеит адепутат Гьаргь Агрба.
"Азакәан иалагалоуп амаҵзура заураны иҟоу ауаа рганахьала аҟазаратә ҭахрақәа, анорматив-зинтә актқәа рекспертиза амҩаԥгара, урҭ акоррупциа алдмыршо иалдыршо аилкааразы", — иҳәеит Агрба.
Иара убасгьы иазгәеиҭеит иаҭахны иҟалар апартиақәа, ауаажәларратә еиҿкаарақәа, иара убасгьы атәылауаа ирымоуп алшара ихьыԥшым аекспертиза амҩаԥгаразы.
Уаанӡа Гьаргь Агрба иазгәеиҭахьан азакәан ишеиҿнакаауа агәҽанҵаратә уснагӡатәқәа ауаажәларра рҟны акоррупциа адымкыларазы. Иара ишьақәнаргылоит аекономикатә еизыҟазаашьақәа рҟны аӡбрақәа рыдкылара рҭышәныртәалара.
Ихымԥадатәиуп аукционқәа, атендерқәа рымҩаԥгара аҳәынҭқарра абиуџьет ала иаанахәо амыругақәа зегь рганахьала ҳәа азгәеиҭеит Агрба.
Иара иажәақәа рыла аиндаҭларақәа рымҩаԥгара азыԥхьагәаҭахоит аобиектқәа арендла ргараан, ахатәтәраан, аҳәынҭқарра аҟынтәи анардадара аформала иарбанызаалак аобиект аиураан.
