АҞӘА, абҵара 4, Sputnik, Роберт Џьапуа. FIFA иалахәым амилаҭтә командақәа ашьапылампыл азы адунеизегьтәи рчемпионат мҩаԥысраны иҟоуп 2016 шықәса лаҵарамза 28 инаркны рашәарамза 6 рҟынӡа. Абри атәы ҳкорреспондент изеиҭеиҳәеит аиҿкааратә еилакы алахәыла Асҭамыр Адлеиба.
"Ашьапылампыл азы ConIFA адунеизегьтәи ачемпионат 2016 шықәса рзы амҩаԥгаразы аӡбра ҳадаҳкылеит иахьа. Ачемпионат амҩаԥгара арыцхәқәа ConIFA анапхгареи ҳареи ҳаицәажәарала ишьақәырӷәӷәоуп", — иҳәеит Адлеиба.
Иара иажәақәа рыла ачемпионат рхы аладырхәраны иҟоуп 12 команда, ахәмаррақәа мҩаԥысраны иҟоуп аҳҭнықалақь астадион "Динамо" аҟны.
"Лаҵарамза 28 рзы ачемпионат аартхоит. Лаҵарамза 29 рзы иалагоит ахәмаррақәа. Ахәмаррақәа мҩаԥысраны иҟоуп аҳҭнықалақь астадион "Динамо" аҟны. Мышкы ала имҩаԥысраны иҟоуп ахәмаррақәа ԥшьба. Рашәарамза 5 рзы афиналтә матч мҩаԥгахоит. Аицлабрақәа рҟны аиааира згаз акомандақәа аԥхьахәқәа ранашьара ацеремониа мҩаԥысуеит рашәарамза 6 рзы, ачемпионат алахәылацәа рыҩныҟақәа рыхынҳәра амшаз» ҳәа азгәеиҭеит Асҭамыр Адлеиба.
ConIFA Анагӡаратә еилакы аилатәараҟны, 2015 шықәса ԥхынгәы 8 рзы, еицҿакны рыбжьы рҭиит 2016 шықәса рзы адунеитә Чемпионат Аԥсны имҩаԥысырц.
Ахада Ихьыԥшым ашьапылампылтә ассоциациақәа Рконфедерациа (ConIFA) еиҿкаан 2013 шықәса рзы. Еиднакылоит FIFA аилазаара официалла иалам атәылақәа ршьапылампылтә командақәа 25.
