АҞӘА, абҵара 30 — Sputnik, Бадраҟ Аҩӡба. Абиблиографиатә енциклопедиатә жәар "Гранат" аизгақәа Аԥсны жәлар Рџьынџьтәылатә еибашьра ашьҭахьҵәҟьа исымԥыхьашәеит, иҳәеит аҳақьым-аԥсихиатр Константин Ануа.
Иара иазгәеиҭеит шамахамзар иумԥыхьамшәо аҭыжьымҭа аус ицызуаз лыҩнаҟны ишибаз.
"Аибашьра алагамҭаз сара аԥсихиатриатә хәышәтәырҭаҟны ҳақьым хадас аус зуан. Уаҟа аус ҳацылуан Колоколова зыжәлаз ҳақьымк. Аибашьра ашьҭахь лара иҳалҳәеит ақырҭуа гвардееццәа аус шрыцылуаз. Убри инамаданы лусура дамхын", — ҳәа азгәеиҭеит Ануа.
Аибашьра ашьҭахь Константин Ануа Аҟәа, араион ҿыц аҟны игылаз иҩны дахылеит.
"Сара исыӡбеит Колоколова илԥеиԥшхаз еилыскаарц. Ҳара ҳаигәылацәан. Лыҩны саннеи уаҩ дыҟамызт. Ашәқәеи аԥенџьырқәеи аартны иҟан. Амаҭәа-аҩыҭәа зегьы ԥсаҟьаны ауадақәа ирыҩнажьын. Сыԥшызар, абри ашәҟәы атомқәа акәакьҭаҟны икҿажьуп. Арҭ рыдагьы ашәҟәқәа рацәан, аха ианҭыжьыз ашықәс санахәаԥш издырит рҵакы адура", — иҳәеит Ануа.
Иара ишиҳәо ала иаразнакы иӡбеит ашәҟәқәа Амилаҭтә библиотекахь инеигарц, аха изымгәаӷьит уаҟа иҟаз аҭагылазаашьақәа ирыхҟьаны. Ашәҟәқәа ԥхасҭахар ҳәа дацәшәеит.
"Сара абиблиотекахь снеиит, аха аибашьра ашьҭахь иара угәы ааканажьыртә еиԥш аҭагылазаашьа аманы иҟан. Нас исыӡбеит, мышкызны аремонт ҟарҵар, аамҭақәа рҽеиҭаркыр, нас иаазгап ҳәа", — иҳәеит иара.
Аенциклопедиатә жәара "Гранат" Урыстәылатәи абиблиографиатә институт иаҭыжьымҭоуп. Ареволиуциа ҟалаанӡа зҭыжьра хацыркыз иуниверсалтәу жәаруп. Аенциклопедиа аҭыҵра мҩаԥысуан 1898-1950 шықәсқәа рзы.
