АҞӘА, ԥхынҷкәын 10 — Sputnik. Женеватәи аиҿцәажәарақәа рымҩаԥысраан Қырҭтәыла еиҭахгьы мап ацәнакит Аԥсни Аахыҵ Уаԥстәылеи Қырҭтәылеи рыбжьара аҭынчраз аиқәшаҳаҭра алацәажәара ҳәа аҳәамҭа ҟанаҵеит Урыстәылатәи Афедерациа Адәныҟатәи аусқәа рминистрра.
"Аԥсни, Аахыҵ Уаԥстәылеи, Қырҭтәылеи рыбжьара амчра ахамырхәаразы азҵаара алацәажәара аҳәаақәа ирҭагӡаны аҽазныкгьы инаҵшьны иазгәаҭан аҭынчра адгыларазы аԥыжәара зманы иҟоу адокумент анапаҵаҩра атәы. Аԥснытәии Аахыҵ Уаԥстәылатәии аганқәа ишьақәдырӷәӷәеит асеиԥш иҟоу адокументқәа разыҟаҵара ишазыхиоу, аха ақырҭуа ган еиҭахгьы мап ацәнакит ари азҵаара алацәажәара", — ҳәа аҳәоит адокумент аҟны.
Аиҿцәажәарақәа рҟны Урыстәыла ахаҭарнакс дыҟан Урыстәылатәи Афедерациа Адәныҟатәи аусқәа рминистр ихаҭыԥуаҩ Григории Карасин. Урыстәылатәи Афедерациа Адәныҟатәи аусқәа рминистрраҟны ишазгәарҭаз ала аиԥылараҟны гәҭынчымрала иазгәаҭан Қырҭтәылеи НАТОи рырратә усеицура.
"Альианс Қырҭтәыла алагалара иҵнашәоит Аахыҵ Кавказ акраамҭала зышьақәыргылара иаҿу аҭынч ҭагылазаашьа, Женеватәи аиҿцәажәарақәагьы абрахь иналаҵаны", — ҳәа азгәарҭеит Урыстәыла адәныҟаполитикатә усбарҭаҟны.
Урыстәылатәи Афедерациа Адәныҟатәи аусқәа рминистрраҟны иара убасгьы иазгәарҭеит ақырҭуа делегациа аиԥылара амш анҵәамҭаз ахҵәацәа рыпроблема ахьцәырыргаз иахҟьаны, аусура шаанкылахаз. Аиҿцәажәара ацхантәаҩцәа ирыӡбеит заа аконсультациақәа хдыркәшарц.
Женеватәи аиҿцәажәарақәа мҩаԥысуеит 2008 шықәса жьҭаарамза инаркны, ЕС-и, ООН-и, ОБСЕ-и рыбжьаҟазарала. Аиԥыларақәа ирылахәуп Аԥсныи, Аахыҵ Уаԥстәылеи, Қырҭтәылеи, Урыстәылеи Еиду Америкатәи аштатқәеи рхаҭарнакцәа.
2008 шықәса рзы Урыстәыла иазханаҵеит Аԥсны Аҳәынҭқарреи Аахыҵ Уаԥстәыла Аресспублики рхьыԥшымра. Уи аҭакс Қырҭтәыла Урыстәыла аганахь ала адипломатиатә еизыҟазаашьақәа ааннакылеит, арҭ аҵакырадгьылқәагьы "аоккупациа зызуу аҵакырадгьылқәа" ҳәа ирышьҭоуп.
