АҞӘА, ԥхынҷкәын 10 — Sputnik, Саид Барганџьиа. Апрограмма хықәкны иамоуп аҵара ахаҭабзиара ашьҭыхреи аҵаратә процесс еиҳа хра аманы аҟаҵареи, иҳәеит Аминистрцәа Реилазаара аилатәараҟны Аҵара аминистр ихаҭыԥуаҩ Дмитри Гәарамиа.
Иара иажәақәа рыла апрограмма иазыԥхьагәанаҭо анагӡаразы иҳәаақәҵоуп еиуеиԥшым ауснагӡатәқәа.
"Хаҭала, аҵара ахаҭабзиара асистема аԥҵара, иҟоу адыррақәа реимдара, ақыҭақәа рҟны арҵаҩ изанааҭ аҳаҭыр ашьҭыхра", — иҳәеит Гәарамиа.
Апрограмма анагӡаразы иазоужьуп 12 миллион мааҭ инареиҳаны аԥара.
Иара иазгәеиҭеит апрограмма "Аҵара – 2016" апрограммаҵаҟәшақәа хԥеи, еиуеиԥшым ауснагӡатәқәеи агәаҭарақәеи шаҵанакуа.
Иара убасгьы иазгәеиҭеит ишазыԥхьагәаҭоу аинформациатә системақәа рыларҵәара алзыршо аинтерактивтә напхгара асистемеи, аҵара ахаҭабзиара ахәшьара аҭареи.
"Ҳтәылауаа ироуеит алшара аҵара асистемаҟны иҟоу алшамҭақәеи апроблемақәеи рдырразы", ҳәа азгәеиҭеит иара.
Иара убасгьы иациҵеит ԥхьаҟазы ишазыԥхьагәаҭоу Аԥсны иҟоу аҵаратә усҳәарҭақәа аконкуренциа рзаԥҵара.
Аминистрцәа Реилазаара еицҿакрыла ирыдыркылеит аҳәынҭқарратә программа "Аҵара – 2016".
