АҞӘА, ԥхынҷкәын 21 — Sputnik Саид Барганџьиа. "Амшынеиқәафымцамч" адиректор хада Аслан Басариа имҩаԥигаз апресс-конференциаҟны иҳәеит аҳәынҭеилакы зегь рзы иаарту аполитика амҩаԥгар ишалагаз.
Иара иажәақәа рыла Ареспубликатә Унитартә наплакы "Амшынеиқәафымцамч" ахы ианархәоит 90 процент рҟынӡа иажәхьоу ахархәагақәа.
"Аенергетика аусхк аҟны системала азҵаара аӡбра алшоит аинвестициақәа рыҟазаараан. Аинвестициақәа ыҟам, ус анакәха афымцамч аекономиа азулатәуп", — иҳәеит Басариа.
Иара иҳәеит зны-зынла ауааԥсыра хаԥышәала аенергосистема ишаҿаԥыршьуа рхатә цәаҳәақәа.
"Даара ҳшәыҳәоит иҟашәҵо акыр шәазхәыцларц, избанзар афымцамч ахаҭабзиара асеиԥш иҟоу аусқәа ирыдҳәалоуп", — иҳәеит Басариа.
Иара иазгәеиҭеит ашықәс ианалага инаркны афонд хадақәа ринвентаризациа ишаҿу.
"Аинвентаризациа мҩаԥысуанаҵы иаарԥшхеит зынӡа иҟаӡам аобиектқәа", — иҳәеит "Амшынеиқәафымцамч" адиректор.
Иара иҳәеит аилак акыр ибеиоуп ҳәа ирҳәо шиашам.
"Абиуџьеттә ԥаразоужьра аганахьала аҭагылазаашьа акыр иуадаҩуп. Урыстәылатәи ацхыраара акәзар, ҳгәыӷуеит еиуеиԥшым ауснагӡатәқәа алнаршап, ҳаргьы афымцамч ахаҭабзиара еиӷьаҳтәып ҳәа", — иҳәеит Басариа.
Иара иажәақәа рыла аҳәынҭқарра ацхыраара ҟанаҵоит, ауадаҩрақәа еиҳа мариала ахгаразы.
Басариа еиҭеиҳәеит афымцамч ахархәара еиҳа-еиҳа ишеизҳауа.
"Ацәаҳәақәа рҟны авариақәа ҟалом ҳәа ҳҳәом. Ахархәара еиҳахацыԥхьаӡа авариақәа рыҟаларагьы еиҳахоит. Ҳара системала аусурақәа мҩаԥаагоит", — иҳәеит Басариа.
