АҞӘА, ԥхынҷкәын 30 — Sputnik, Бадраҟ Аҩӡба. Урыстәыла зҽаԥсазтәыз артист Борис Артемиев напхгара ззиуа Ростовтәи ацирк аестрада-цирктә лакә "Фунтик ашықәсҿыцазтәи ихҭысқәа" апремиера мҩаԥысит Аԥснытәи аҳәынҭқарратә филармониаҟны аҩаша, ԥхынҷкәын 29 рзы.
"Ҳара аинтерес зҵоу аспектакль ықәҳаргылеит. Ааԥхьара анҳау Аԥсныҟа ҳааит", — иҳәеит Урыстәыла зҽаԥсазтәыз артист Борис Артемиев.
Иара иазгәеиҭеит акыр шыҵуа Аԥсни иареи еимадоижьҭеи.
"Саныхәыҷызгьы арахь сааргалон. Сҭаацәагьы ацирк иартистцәан. Пицундоуп аӡсара ахьысҵаз. Сара сзы Аԥсны даара игәакьоуп. Даара бзиа избоит аратәи амш лашақәа, даара бзиа избоит аԥсуа жәлар – ихьыԥшым, згәы аарту, зхы ҳаракны изку. Арахь иаагеит ахәыҷқәа рзы аинтерес зҵоу аспектакль", — иҳәеит иара.
"Аспектакль ҿыцуп. Мызкоуп иҵуа иқәҳаргылеижьҭеи. Ахәыҷқәа даара иргәаԥханы ирыдыркылоит", инаҵшьны иазгәеиҭеит Артемиев.
"Сара ҭабуп ҳәа расҳәоит артистцәа рықәгылара еиҿызкааз. Ахәыҷқәа рхаҿқәа рхаччо ирыдыркылеит аспектакль", — лҳәеит ахәаԥшҩы Диана Кавалишкина.
Ақәгылара амҩаԥгара ацхыраара анаҭеит Акультура аминистрра.
