АҞӘА, ажьырныҳәа 18 — Sputnik, Наала Аҩӡыԥҳа. Аԥсны агәырбнара ахшьаара азин аҟамҵара иазку Аминистрцәа Реилазаара Ақәҵара анрыдыркыла ашьҭахь агәырбӷьқәа рыхшьаара 95 процент рыла еиҵахеит иҳәеит аекологиеи аԥсабара ахьчареи Рҳәынҭқарратә еилакы ахантәаҩы Савелии Ҷыҭанаа.
"Ҵыԥх, еиуеиԥшым амзызқәа ирыхҟьаны ҳагәҭакы ишахәҭаз еиԥш иаҳзеиҿымкааит. Сынтәа ари аус ианаамҭаз нап алаҳкит, убри азы ианаамҭаз Аминистрцәа Реилазаарагь ирыдыркылеит Аԥсны агәырбнара ахшьаара азин аҟамҵара иазку Ақәҵара рыдыркылеит. Аминистрцәа Реилазаара Ақәҵара анрыдыркыла ашьҭахь агәырбӷьқәа рыхшьаара 95 процент рыла еиҵахеит. Ҳәарада Ақәҵара аус ауит", — иҳәеит Ҷыҭанаа.
Ҷыҭанаа иажәақәа рыла уаанӡа, есышықәса 5 000 инаркны 7 000-10 000 рҟынӡа ԥсаҵла ԥырҟон.
"Хәышықәса рыҩныҵҟа аҵлақәа ԥырҟозар – 50 000 рҟынӡа ҵла ԥҟахоит, жәашықәса рыҩныҵҟа уи ахыԥхьаӡара 10 000 рҟынӡа инаӡоит. Асеиԥш иарбанызаалак екосистемак иазычҳауа иҟам", ҳәа азгәеиҭеит аекологиеи аԥсабара ахьчареи Рҳәынҭқарратә еилакы ахантәаҩы Савелии Ҷыҭанаа.
"Ашьхаҟәаҟәақәа рыхтра ақәоурақәа раан адгьылқәыӡәӡәаарахь икылыргоит. Аҵлақәа рдацқәа адгьыл дырӷәӷәоит, иааныркылоит" — иҳәеит Ҷыҭанаа.
Аԥсны аеколог хада ишиҳәаз ала Аԥыза-министр ареспублика абнахьчаратә нхамҩа аиҳабыра рҿаԥхьа дҵаны иқәиргылеит агәырҵлақәа рааӡарҭа апитомник аадыртырц. Ареспубликаҟны абасеиԥштәи ахатәы питомник аԥырҵаанӡа аԥсаӡқәа Урыстәылантәи иааргалоит.
