АҞӘА, ажьырныҳәа 18 — Sputnik, Асида Кәыҵниаԥҳа. Шьамтәылатәи Аџьар ҟаԥшь аусзуҩцәа имҩаԥыргеит автомабилтә авариақәа рҟны ааха зауыз раԥхьатәи ацхыраара рыҭашьа акурс.
"Аԥсны лассы-лассы автомабилтә авариақәа ҟалалоит. Убри азы акраҵанакуеит ишахәҭоу еиԥш, ауаҩы ԥырхага имоуртә ацхыраара иҭара. Азымдырра иахылҿиаауа акыр шәарҭа ыҟоуп", иҳәеит Шьамтәылатәи Аџьар ҟаԥшь аусзуҩ Омар Шагуев.
Аиҿкааҩ Асида Быҭәԥҳа лажәақәа рыла раԥхьатәи ацхыраара ауаҩ иҭашьа адырра зегьы рзы ихәарҭоуп.
"Ауаа усеиԥштәи аҭагылазаашьақәа раан имшәакәа, иҟарҵо рдыруа иҟазароуп", — лҳәеит Быҭәԥҳа.
Аџьар ҟаԥшь аусзуҩ Омар Шагуеви акурс азыҟаҵаҩ Надир Саиди имҩаԥыргараны иҟоуп хымштәи акурсқәа.
