АҞӘА, ажьырныҳәа 27 — Sputnik, Асида Кәыҵниаԥҳа. Аҩаша, ажьырныҳәа 26 рзы Аԥсны Адәныҟатәи аусқәа рминистрреи италиатәи Ассоциациа "Европа-Аԥсни" Амеморандум рнапы аҵарҩит. Иара иахықәкы хаданы иҟоуп Аԥсны аимидж Европа хра аманы аларҵәара. Уи азы еицымҩаԥыргалараны иҟоуп акультуратәи асоциалтәи уснагӡатәқәа. Аминистр В. Чрыгба иажәақәа рыла Аԥсни Италиеи ԥхьаҟазы еицымҩаԥыргаша аплан рацәа рымоуп.
Ассоциациа "Европа-Аԥсны" амаӡаныҟәгаҩ хада, Италиа аҵара зҵоз Аԥсны атәылауаҩ Дмитри Кәартаа иажәақәа рыла Ассоциациа иахықәкы хаданы иҟоуп Аԥсны аимидж Европа хра аманы аларҵәара. Уи азы еицымҩаԥыргалараны иҟоуп акультуратәи асоциалтәи уснагӡатәқәа.
"Ҳара ҳзы ихьӡуп иахьа абри аҩыза Амеморандум анапаҵаҩра. "Европа-Аԥсны", Европа аԥснытәи апаспортқәа рыла иҭарҩыз раԥхьатәи еиҿкаароуп", — иҳәеит Кәарҭаа.
Жәларбжьаратәи адипломатиатә обсерваториа ашьаҭаркҩы Вито Гриттани иазгәеиҭеит Ассоциациа адгылара шеиҭало. Иара зегьы идирбеит Италиа иҭарҩыз Ассоциациа аофициалтә логотип.
Ассоциациа "Европа-Аԥсны" аԥҵан 2015 шықәса цәыббра 16 рзы. Ашьаҭаркыҩцәа иреиуан аԥсуа ган аганахьала – Кан Ҭаниа, Ҭенгьиз Ҭарба, Дмитри Кәартаа.
Ассоциациа апрезидентс далхуп Акилли Ночито (Италиа).
