АҞӘА, жәабран 3 — Sputnik. Аԥсны Аҩныҵҟатәи аусқәа рминистр Леонид Ӡаԥшьба идҵала Аԥсны Аҩныҵҟатәи аусқәа рминистрра аусзуҩцәа Гарик Лашәриеи Даур Калатал-оӷли рмаҵура иамхуп ижәны аԥсҟы ахьыркыз иахҟьаны, ҳәа аанацҳауеит аусбарҭа апресс-маҵзура.
Апресс-маҵзура адыррала авариа иахҟьаны ԥсыҭбара ҟамлеит.
"Амедицинатә гәаҭара рахыжьраан Аԥсны Аҩныҵҟатәи аусқәа рминистрра аусзуҩцәа Гарик Лашәриеи Даур Калатал-оӷли арыжәтә ыжәны ишыҟаз шьақәыргылахеит", ҳәа аанацҳауеит апресс-маҵзура.
Аусбарҭа апресс-маҵзура адырра ҟанаҵоит Очамчыра араион аҳәынҭавтоинспекциа аиҳабы Енвер Канджи-оӷлы Аԥсны Аҩныҵҟатәи аусқәа рминистрра акадырқәа рахь диагоуп, лахьы ӷәӷәа иҭоуп Очамчыра араион аҩныҵҟатәи аусқәа рыҟәша аиҳабы ихаҭыԥуаҩ Дмитри Ҭодуа.
Аԥсны Аҩныҵҟатәи аусқәа рминистр Леонид Ӡаԥшьба адҵа ҟаиҵеит аҳәынҭавтоинспекциа, ахылаԥшратә маҵзура, ашьаусԥшаара русзуҩцәа рзы адисциплина аганахьала асеминарқәа мҩаԥыргарц.
2016 шықәса ажьырныҳәа 20 рзы Ԥсоу-Игры амҩаду аҟны, Аҽгәара ақыҭа ааигәа амҩатә машәыр ҟалеит. Аҭыԥ ахь инеиз Аҩныҵҟатәи аусқәа рминистрра аҳәынҭавтоинспекциа аусзуҩцәа ишьақәдыргылеит амашьына аԥсҟы зкыз Аԥсны Аҩныҵҟатәи аусқәа рминистрра аусзуҩ Гарик Лашәриеи автомашьына апассаџьыр Даур Калатал-оӷли рхарала дара зықәтәаз амаҵзуратә машьына автомашьынақәа "Мерседеси" "Нивеи" ишрынҟьаз.
