АҞӘА, жәабран 3 — Sputnik, Саид Барганџьиа. Гал араион аҭыԥантәи ахаланапхгараҭаратә органқәа рдепутатцәа рзинмчра аҿҳәара 2017 шықәса жәабранмза 12 рҟынӡа инахоуп.
Жәлар Реизараҟны атәыла Ахада ихаҭарнакыс иҟоу Дмитрии Шамба иазгәеиҭеит Гал араион аҟны апаспортқәа роура аҭагылазаашьа инагӡаны иахьыӡбам инамаданы ари араион аҟны аҭыԥантәи ахаланапхгараҭаратә органқәа рахь алхрақәа рыҿҳәара инахатәуп 2017 шықәсанӡа, егьырҭ араионқәа рҟны асеиԥш ԥынкылара џьаргьы иҟам.
"Абри аамҭала иҟоу апроблема аҭыԥ иқәҵахоит", — иҳәеит Шамба.
Иара убасгьы иазгәеиҭеит атәыла анапхгара абри аганахьала аусура ишаҿу.
Жәлар Реизара аиҳабы Валери Бганба иажәақәа рыла атәыла анапхгара аусура аамҭа рацәала аиҵыхра Апарламент иагәаԥхо иҟам.
"Ҳара иаарласны апаспортқәа рыҭара азҵаара ҳаӡбароуп, мамзар уи ҳаԥхьаҟатәи абиԥарақәа ирзынхоит. Дара уи ишахәҭоу еиԥш аӡбра рзаҭом", — иҳәеит Апарламент адепутат Аслан Кәабахьиа.
Иахьазы аус зуа адепутаттә корпус еиҿкаан 2011 шықәса жәабранымзазы.
"Гал араион аҭыԥантәи ахаланапхгараҭаратә органқәа рдепутатцәа рзинмчра аҿҳәара ацҵаразы" азакәан иадгылан рыбжьы рҭиит иҭаҩыз 22 рҟынтәи 20-ҩык адепутатцәа, ҩыџьа рыҽхьаркит.
