Сҭампыл инхо, етнографиатә хылҵшьҭрала Цәыџьаа рахь иаҵанакуа Есаҭ Ахба аԥсуаа рашәаҳәаратә культура, игәы азыбылуеит, иӡыр ҳәа дшәоит.
Иара иҳәоит, уи аҟара дшазҟазамгьы, зны-зынла амырзакангьы аирҳәалоит.
Амырзакан XIX ашәышықәсазы Германиантәи Урыстәыла иаанагеит, анаҩс Урыстәылантәи Кавказҟа иқәнагалеит. Ари амузыкатә инструмент аԥсуаа ҳаԥсҭазаара иаланагалеижьҭеи ирацәаӡаны ишымҵуагьы иарала имаҷымкәа ашәақәа аԥырҵахьеит. Амырзакан аԥсуаа иадырҳәоз ихәыҷны иҟоу ауп. Уаҟа ари амузыкатә арҳәага аныҳәақәа зегьы рҿы ирыцуп.
Амырзакан абжьы анраҳалак зегьы ирдыруеит иазырҳәо аԥсуаа шракәу. Ари аинструмент ҳдиаспораҿы инхо аԥсуаа рыԥсҭазаара иузаҟәымҭхо иадҳәалоуп. Иара еиҳараӡак иазырҳәоз аҭыԥҳацәа ракәын, аха иҟоуп амырзакан азырҳәо арԥарцәагьы (ахацәагьы).
