АҞӘА, хәажәкыра 24 – Sputnik. Ареспублика Апрокурор хада Алексеи Ломиа иааицҳаит алхратә закәанԥҵара ақәныҟәара аганахьала аинформациа агәаҭаразы акомиссиа ҷыда шалыххо. Иара даԥхьеит Тҟәарчал араион ауааԥсыра рыхәҭак рырзаҳал, зыҟны анапаҵаҩрақәа реизгара мцҳәарыла имҩаԥгоуп ҳәа аҳәо. Абри атәы аанацҳаит Апрокуратура хада Апресс-маҵзура.
Уажәазы абри афакт аганахьала аҭҵаарақәа амҩаԥысра иаҿуп. Абри атәы Алексеи Ломиа иазгәеиҭеит, аҭыԥантәи ахаланапхгараҭаратә органқәа рахь алхрақәеи ареферендум амҩаԥгареи ирызкыз инарҭбаау аилацәажәараҟны.
Иара иазгәеиҭеит арҭ ауснагӡатәқәа рыҩбагь атәылаз аҵакы рыманы ишыҟоу, азхьаԥшра ду шазутәу алхыҩцәа рзинқәа рыхьчара. Азакәан аилагараан иахәҭоу ахырыҩ аҭатәуп, иҳәеит апрокурор хада.
Апрокурор хада иара убасгьы иазгәеиҭеит алхратә закәанԥҵара ақәныҟәара аганахьала аинформациа агәаҭаразы акомиссиа ҷыда шалыххо. Акомиссиа иааиԥмырҟьаӡакәа аус рыцнаулароуп апрокуратура аорганқәеи ахылаԥшра зуа азинхьчаратә органқәеи.
