АҞӘА, хәажәкыра 31 — Sputnik, Бадраҟ Аҩӡба. Ахәыҷтәы рҿиаратә ҩны "Аинар" аҟны имҩаԥысуа асахьаҭыхыҩцәа ҿарацәа рцәыргақәҵа "Аҵасқәа" аҟны аиааира лгеит Липецктәи асахьаҭыхратә школ ахаҭарнак Анна Клименкова.
"Сара ари даара агәеизҳара снаҭеит. Асахьаҭыхра снапы алакуижьҭеи 8-шықәса ҵуеит. Аиааира згаз сусумҭа амшын иазкуп", — лҳәоит Анна Клименкова.
Актәи аҩаӡара змоу адиплом ланашьахеит Камилла Арышԥҳа (Аҟәатәи асахьаҭыхратә школ). Аҩбатәии ахԥатәии аҭыԥқәа ааныркылеит Ольга Кедровскаиеи Алена Пешковеи (Липецктәи ашкол).
Аԥсны Акультура аминистр Ельвира Арсалиаԥҳа иазгәалҭеит ахәыҷы иҭихуа асахьа иара идунеи шаныԥшуа, еиӷьу аусумҭа алхрагьы шыуадаҩу.
"Ахәыҷтәы конкурсқәа рҟны аӡбара даара исцәыуадаҩуп", — лҳәеит лара аконкурс иалахәыз дрыдныҳәало.
Аминистр иара убасгьы иазгәалҭеит ахәыҷтәы рҿиара Аҩны "Аинари" Иарославль, Липецк ақалақьқәа рҟны иҟоу асахьаҭыхратә школқәеи аимадара рымоижьҭеи акр шааҵуа.
"Агәыӷра сымоуп Аԥснынтәи агәалашәара ԥхақәа шыжәго. Агәра згоит, зегь шәакәымхаргьы, асахьаҭыхра зҽазызкуа шәшыҟало", — лҳәеит лара.
Липецк ақалақь асахьаҭыхратә школ №2 адиректор Ирина Кошелиаева иазгәалҭеит аконкурс аҩаӡара ҳаракы аманы ишымҩаԥысыз.
"Аԥсуа дгьыл даара иԥшӡоуп. Асасдкылара аҩаӡара ҳаракуп. Сгәыӷуеит ԥхьаҟагьы аиҩызара ҳаманы ҳҟалап ҳәа" — лҳәеит лара.
Ажиури ахантәаҩы, Васили Суриков ихьӡ зху Москватәи аҳәынҭқарратә институт апрофессор Владимир Аверианов иазгәеиҭеит ацәыргақәҵахь ицәыргаз аусумҭақәа зегьы ҟазара ҳаракыла иҭыхын ҳәа.
"Аусумҭақәа ирныԥшит аԥсабарахь абзиабара ду. Дара зегьы хаҭа-хаҭала иуникалтәуп уҳәар ауеит. Аԥсны аӡбахә сара исаҳаит 33 шықәса раԥхьа, ашәҟәыҩҩы Георги Гәлиа иҟынтәи. Иара убри ашықәс, 1983 – тәи ашықәс азы Аҟәаҟа сааит", — иҳәеит иара.
Аконкурс "Аҵасқәа" иалахәын 150 усумҭа.
