АҞӘА, мшаԥымза 4 — Sputnik, Наала Аҩӡыԥҳа. Аминистрцәа Реилазаара анапынҵала аҳәынҭеилакы аусуҩцәа нап адыркит астадион "Динамо" иамоу агхақәа рышьақәыргылара, ҳәа ҳаиҳәеит аилак адиректор Игорь Казанба.
Аргылаҩцәа акомиссиа, адефекттә акт еиқәзыршәаз, рыӡбра иқәныҟәоит. Акомиссиа иалахәуп Акапиталтә ргылара Аусбарҭа, Аспорти абаҩрҵәыреи рзы Аҳәынҭқарратә еилакы, Аԥсуа телехәаԥшра, аргыларатә еилахәырақәа, ЗҲӘА "Иукос" рхаҭарнакцәа.
"Аҟәаргылара" адиректор Гурам Ҳаразиа иажәақәа рыла аргылаҩцәа иқәдыргылоит аӡхагалага насосқәа, аӡыхьшәашәеи аӡыԥхеи реизакырҭақәа.
"Ақалақь аҟны аӡы ыҟамзар астадион аҟынгьы иҟалом. Усеиԥш ҟамларц азы аӡеизакырҭа ықәҳаргылоит. Аӡхагалагақәагьы ықәҳаргылот. 2 000 литрак аӡыршы зкуа абоилерқәа ықәҳаргылоит. Мышкы 4 хәмаррак мҩаԥысуеит. 60-ҩык ауаа ирызхо аӡы азапас ыҟазароуп", — иҳәоит Ҳаразиа.
Аргыларақәа мҩаԥгахоит 7,5 миллион мааҭ рыхә. Ӡыла астадион аиқәыршәара адагьы фымцалагьы еиқәыршәахоит.
Казнба иажәақәа рыла "Аладатәи аргыларатә еилахәыра" иагнажьыз аусурақәа ханарҭәаауеит. Уи 1,8 миллион мааҭ артәоит. Ателерадиоеилахәыра акәзар атранслиациақәа рымҩаԥгара азнархиоит.
Аԥыза-министр идҵала аусурақәа лаҵарамза аҩбатәи азыбжазы ихыркәшахароуп.
Ачемпионат ахәмаррақәа хацнаркуеит 2016 шықәса лаҵарамза 28 рзы, Аҟәатәи астадион "Динамо" аҟны. Афинал арыцхә ҳәа ишьақәыргылоуп рашәарамза 5. Атурнир иалахәхоит 12 команда.
