АҞӘА, мшаԥымза 19 — Sputnik, Саид Барганџьиа. Аминистрцәа Реилазаара еицҿакрыла Владимир Қапба "Аԥсны" аредакторс деиҭалырхит аҩаша, мшаԥымза 19 рзы.
Владимир Қапба диит Очамчыра араион Арасаӡыхь ақыҭа 1949 шықәсазы ажьырныҳәа 7 рзы. Ҷлоутәи абжьаратә школ даналга, 1968 ш. рзы дҭалоит А.М.Горки ихьӡ зхыз Аҟәатәи арҵаҩратә институт афилологиатә факультет.
Аинститут даналга аамышьҭахь еиуеиҧшым аҭыҧқәа рҿы аус иуан: рҵаҩыс ашкол аҿы, бригадирс аколнхараҿы, Аҟәа ашәҟәҭыжьырҭа "Алашара" аҟны корректорс, редакторс.
1978 шықәса инаркны 1981 шықәсанӡа аус иуан аҧсуа радио акорреспондетс, аҟәша аредакторс.
1981 шықәсазы диаргеит агазеҭ "Аҧсны ҟаҧшь" ахь. Раҧхьа корреспондентс, нас акультуреи абзазареи рыҟәша аиҳабыс.
2011 шықәса наиабр 23 рзы агазеҭ "Аҧсны" аредактор хадас дшьақәдырӷәӷәеит.
2011 шықәса раахыс Аҧсны ажурналистцәа Реидгыла ахантәаҩыс дыҟоуп.
Далахәын Аџьынџьтәылатә еибашьра 1992-1993 ашықәсқәа рзы, ианашьоуп "Агәымшәаразы" амедал. Ихҵоуп "Аҧсны зҽаҧсазтәыз ажурналист" ҳәа аҳаҭыртә хьӡы. Ианашьоуп "Ахьӡ-аҧша" аорден ахҧатәи аҩаӡара.
