Гогәуа: Ҳазлахәыз аиԥыларақәа зегьы қәҿиарала имҩаԥысит

© Foto / Сырма АшәԥҳаАпрель 12 инаркны 17-нӡа, Аԥснытәи аделегациа усуратә визитла Ермантәылатәи Ареспублика иаҭааит.
Апрель 12 инаркны 17-нӡа, Аԥснытәи аделегациа усуратә визитла Ермантәылатәи Ареспублика иаҭааит. - Sputnik Аҧсны
Анапаҵаҩра
Мшаԥымза 12 инаркны 17-нӡа Аԥснытәи аделегациа усуратә визитла Ермантәылатәи Ареспублика иаҭааит. Уи аилазаараҿы иҟан ауаажәларратә еиҿкаара "Жәларбжьаратәи афонд Аԥсны" ахада Сонер Гогәуеи, афонд аҟны иаԥҵоу асоциалтә политика ахеилак анапхгаҩы Иулиа Гәымԥҳаи.

Аиҿцәажәара мҩаԥылгеит Сырма Ашәԥҳа

- Сонер, шәазааҭгыларц сҭахуп Ермантәылатәи Ареспубликахь шәцара хықәкыс иамаз? 

— Ҳара Ермантәылаҟа ҳцара хықәкыс иаман аекономика ахырхарҭала аусеицура амҩақәа рыԥшаара. Ишдыру еиԥш, аҵыхәтәантәи аамҭазы, Урыстәылеи Ҭырқәтәылеи реизыҟазаашьа иахҟьаны Аԥсныи Ҭырқәтәылеи ирыбжьаз адәныҟатәи ахәаахәҭра еиҵахеит. Убри аҟынтә ҳара иаԥшьаҳгеит альтернативтә мҩақәақәа рыԥшаара. Ҳара иаҳҭахуп географиала еиҳа иаҳзааигәоу атәылақәеи ҳареи аимадареи, аусеицуреи, аиҩызареи ҳабжьаҵара. Убри хықәкыс иҟаҵаноуп Ермантәылаҟа ҳазцазгьы. Ермантәылатәи Ареспублика Аԥсны ахьыԥшымра азханамҵацзаргьы, жәытә аахыс арҭ аҩ-тәылак аизыҟазаашьа бзиа рыбжьоуп, ҳаҭырла еизыҟоуп. 

Бзыҧҭантәи ахәыҷқәа Аҧсуа драматә театр аҿы аспектакль иахәаҧшит

- Ермантәыла шәыҟазаара иалагӡаны иарбан еиԥыларақәоу шәызлахәыз?

— Ииашаҵәҟьаны, хра злаз, аԥхьаҟа алҵшәа бзиақәа аиуп ҳәа ҳзықәгәыӷша, хырхарҭала еиуеиԥшымыз аиԥыларақәа мҩаԥысит. Ҳара ҳлыдылкылеит Ермантәылатәи Ареспублика апарламент ахада ихаҭыԥуаҩ Ермине Нагдалиан. Анаҩс, Ермантәылатәи Ареспублика аиҳабыра реилазаараҟны иаԥҵоу еиҭамҵуа амазареи, акадастри рзы аҳәынҭқарратә хеилак аиҳабы Мартин Саркисиан ҳидикылеит. Мартин Саркисиан, иара убас, Ермантәылатәи ахәаахәҭра-ааглыхратә палата ахадас дыҟоуп. Ермантәылатәи Ареспублика адәныҟатәи аусқәа рминистрра аҟны аус зуа адиаспора аҟәша анапхгаҩи ҳареи ҳазлахәыз аизара еиҿкаан. Еиԥыларацыԥхьаӡа, ҳәарада иааҳарԥшуан агәҭынчымра шҳазцәырнаго, Ашьха-Ҟарабах имҩаԥысуаз ашәарҭара зцыз аҭагылазаашьазы. Агәыӷра ааҳарԥшуан, уаҟа имҩаԥысуа ахҭысқәа иаарласны ишҭышәынтәало, аҭынчра шыҟало. 

- Сонер, шәеиԥыларақәа еиҳарак ҟазшьаз ирымааз, шәхықәкы нашәыгӡартә еиԥш шәусқәа реиҿкаара шәзалыршама? 

— Хымԥада, ҳхықәкы анагӡара ҳалҳаршеит. Аҭагылазаашьа иаҳнарбап ҳаԥхьаҟа ҳусқәа рыҿиашьа. Ҳара ҳрылацәажәеит Аԥсныи Ермантәылеи рыбжьара ахәаахәҭра аҿиара иадҳәалоу азҵаарақәа жәпакы. Иара убас, инарҭбааны ҳазааҭгылеит Аԥсны асоциал-економикатә ҭагылазаашьа зеиԥшроу, атуризм аусура шцо уҳәа ахырхарҭақәа жәпакы. Аҩтәылак русура иазкыз ихаҭәаау аинформациа ҳабжьаҳҵеит. Уи ҳусура акыр иарманшәалап ҳәа ҳақәгәыӷуеит. Алшара ҳаман абизнесменцәа ҳарԥылартә еиԥш. Ҳаҟан иара убас, алогистикатә еилазаараҿ, уи аиҳаби ҳареи ҳаицәажәеит. Имҩаԥысит Ермантәылатәи Ареспублика аҟны иаԥҵоу афонд "Ермантәылатәи аҳәса-анаплакыҩцәа Реидгыла" ахада Лилиа Геворгиани ҳареи ҳаиқәшәара. Лара, иара убас, ахәаахәҭра-ааглыхратә палата азҵаарақәа рзы Ермантәылатәи Ареспублика ахада иабжьгаҩс дыҟоуп. 

Англиа еиҿкаау аԥсуа-дыга жәлар ркультуратә центр ахаҭарнакҵәа - Sputnik Аҧсны
Аҭрышԥҳа: аԥсуа ԥҳәыс адунеи аҿы зегь реиҳа иӷәӷәоу ԥҳәысуп

- Сонер, шәеиԥыларақәа рҟынтә лкаақәас иҟашәҵарц шәылшои?

— Аиԥыларақәа зегьы рҟны ҳара ҳазааҭгылеит, иҭаҳҵааит, иазгәаҳҭеит, аԥхьаҟа иарбан хырхарҭақәоу рыла ҳусеицура злашьақәҳаргыло. Ҳрылацәажәеит еицаҳзеиԥшу апроектқәа рыла аусеицура, аиқәышаҳаҭра ҳабжьаҵара. Зегь раԥхьа иргыланы, аекономика аганахь ала, Ермантәыла аԥыжәара амоуп аԥсыӡ шылеи, ахәшеи рааглыхра, иара убас арыжәтә џьбарақәа раалыҵ, ҿырԥштәыс иаагозар, еицырдыруа аерман кониак уҳәа. Дара рганахь ала акыр азҿлымҳара аман, Аԥсны иҭҳажьуа аԥсыӡ шылеи, ахәшеи рааглыхра. Иаарласны арантә уи аалыҵ Ермантәылаҟа адәықәҵара нап аҳаркуеит. Ҳара игәаҳҭеит ақыҭанхамҩа аус аҩаӡара акыр ишаҳараку, аалыҵ ахаҭабзиара шамоу, ахәқәагьы шыҳаракым. Уи ахырхарҭалагьы аусеицура ҳазааҭгылеит. Ермантәылатәи аделегациа Аԥсныҟа ааԥхьара раҳҭеит. Ажәа злаҳарҭаз ала, рашәарамзазы иаараны иҟоуп. Ҳара ҳганахь ала аиԥыларақәа ҳарзыхиоуп, ҳҽырзыҟаҳҵоит.   

- Аԥхьаҟа, егьырҭ атәылақәа рахь ацара азгәаҭаны ишәымоума? 

— Ааи, хымԥада. Ермантәылатәи Ареспублика ала ҳалагеит. Иаарласны ҳгәы иҭоуп Белоруссиа, Ҟазахстан, Татарстан, Иран уҳәа атәылақәа жәпакы рҭаара. 

Астол гьежь "Ҳазҭагылоу аамҭа: аҵас, ақьабз" Аҟәа имҩаԥысит

- Ермантәылатәи Ареспублика анаҩс, шәусура иацҵан Урыстәылатәи Афедерациа ақалақь Москва. Шәусура аҳҳәаа ҟашәҵарц ҳҭахуп. 

— Урыстәылатәи Афедерациаҿы имҩаԥысуаз аусуратә еиԥыларақәа сара инасҷыданы дрылахәын "Жәларбжьаратәи афонд Аԥсны" ахада ихаҭыԥуаҩ Мақсим Ӷәынџьиа. Ишыжәдыруа еиԥш, ҳара ҳфонд, згәабзиара уашәшәыроу ахәыҷқәа рзы агәыҳалалра мҩаԥнагоит. Ҳаҳҭнықалақь аҿы иаԥҵоу ареабилитациатә центри, акультура-гәыҳалалратә фонд "Ашанеи" ҳареи аусеицуразы аиқәшаҳаҭра ҳабжьоуп. Ҳапроект иахьӡуп "Агәабзиара". Ҳара ҳус алҵшәа бзиа аиуразы ҳҳәаақәа рырҭбаара ҳашьҭоуп. Москва ақалақь аҿы имҩаԥысит  аинвалидцәа еидызкыло арегионалбжьаратә, агәыҳаларатә, ауаажәларратә еиҿкаара "Агәыӷразы аԥра" ахада Лариса Зеленцовеи ҳареи ҳаиԥылара. Инарҭбааны ҳазааҭгылеит ҳфонд аусура ахықәкы. Даара гәахәала илыдылкеит. Ҳазҭоу амза, апрель 29 рзы, лара дызлахәу Шәача ақалақь аҿы аиԥылара азгәаҭаны иҳамоуп. Аусеицуразы аиқәшаҳаҭра ҳнапы аҵаҳаҩраны ҳаҟоуп.  

Иара убас, аицәажәара мҩаԥаҳгеит Урыстәылатәи Афедерациа ауаажәларратә усзуҩ, аполитолог Сергеи Маркови ҳареи. Ахәҭакахьала иазгәаҳҭеит, иара ипрограмма "Форос" инақәыршәаны Аԥсны имҩаԥгазарц 200-ҩык инарзынаԥшуа астудентцәа, адипломатцәа злахәу аконференциа. Ҳазлахәыз аиԥыларақәа зегьы қәҿиарала имҩаԥысит. 

- Иҭабуп Сонер ҳаиҿцәажәаразы. Шәусқәа зегьы рҿы аманшәалара!

 

Ажәабжьқәа зегьы
0