АҞӘА, мшаԥымза 28 — Sputnik, Анжелика Бениаԥҳа. Афонд "Ашана" ихацнаркит жәымз зхыҵуа Дамеи Қәычбериа игәабзиара аиҭашьақәыргылараз аԥарақәа реизгара. Дамеи хәыҷ изықәгыло адиагноз (остеогенез) инақәыршәаны Москватәи ахәышәтәырҭа Global Medical System Clinic аҟны дрыдыркылараны иҟоуп, ҳәа ҳалҳәеит Афонд аусзуҩ Мактина Џьынџьалԥҳа.
Дамеи Қәычбериа ичымазара шамахамзар иуԥымло, агенетикатә ҟазшьа змоу чмазароуп. Даниуаз инапы, ишьапы, ижәҩахыр ԥыҵәҵәаны диит.
Ахәыҷы иҭаацәа асеиԥш чмазарак ыҟоуп ҳәагьы рмаҳацызт. Дамеи иан, Џьени Қәчбериа ахәыҷы ичымазара иахҟьаны еснагь дышьҭазароуп лҳәеит.
"Иара дзыҳәазом иқәра иақәшәо еиԥш, ихы изаанкылом. Ибаҩқәа акыр иуашәшәыроуп. Ишьҭыхраҵәҟьа ҳацәшәоит. Адунеи иқәу иреицәазар ҟалап ухәыҷы унапаҿы данузымкуа, уанзимылахәмаруа", — лҳәеит ан.
Дамеи иҭаацәа ирылшо ҟарҵоит рхәыҷы ԥхьаҟа зны ихала дныҟәартә еиԥш дҟаларцаз. Аха иахәҭоу амедицинатә цхыраара ада ахәыҷы дхымхәахар алшоит.
Дамеи иҩызоу ахәыҷқәа "асаркьалыхқәа" ҳәа ирышьҭоуп.
Москватәи ахәышәтәырҭа Global Medical System Clinic аҟны дрыдыркылараны иҟоуп, ҳәа ҳалҳәеит Афонд аусзуҩ Мактина Џьынџьалԥҳа. Уаҟа имҩаԥыргараны иҟоуп шықәсык ахь 3-4- памидронат захьӡу ахәшә ала ихәышәтәра.
"Ахәышәтәра курск ахәԥса 460 000 мааҭ аҭахуп. Ахәышәтәра иалнаршоит иҿыцу аԥыҵәҵәарақәа рыҟамлара. Абаҩқәа еиҳа иӷәӷәахоит", — лҳәеит Џьынџьалԥҳа.
Агенқәа рҽеиҭакра ачымазара ԥшьы-хкыкны еихшоит. Зегь раасҭа иуадаҩу ҳәа иршьоит ахәыҷы амгәарҭаҟны ибаҩқәа анхәашо. Афонд аусзуҩ илҳәеит абри аҩыза ачымазара аганахьала аҽа ҭаацәаракгьы Афондахь ишыдҵаалахьоу. Урҭ фышықәса зхыҵуа Аслана Џьынџьалԥҳа лҭаацәа роуп. Аслана хәыҷы Москватәи ахәышәтәырҭаҟны 15 курс дырхысхьеит. Ԥшьышықәса рыҩныҵҟа ахәыҷы лыбаҩқәа ӷәӷәахеит. Иахьа лхала дныҟәоит, дыҩуеит, дыԥоит.
