Аԥсуа ҳәынҭқарратә аҿар ртеатр Димитрис Псафас иҩымҭа "Амцҳәаҩ даҭахыуп" аспектакль апремиера ықәдыргылеит Самсон Ҷанба ихьӡ зху Аԥсуа ҳәынҭқарратә драматә театр асценаҿы.
Арежиссер иажәақәа рыла, атеатр актиорцәеи иареи русеицура алҵшәа бзиақәа аиуит.
"Ари аколлектив рылшарақәеи, рдыррақәеи, ирхәмархьоу арольқәеи ртәы бзиаӡаны издыруеит, убри аҟынтә сымгәаҟӡеит арольқәа ршараан. Ҩымыз аҽазыҟаҵара ҳаҿын, алҵшәа бзиақәа аиуит ҳәа сыҟоуп", — иҳәеит Гыцба.
Аспектакль арежиссиор иазгәеиҭеит, ақәыргылара ишалахәу жәеиза-ҩык актиорцәа, аҿар рнаҩсангьы аиҳабыратә биԥара иаҵанакуа актиорцәа шыҟоу. Ихадоу арольқәа нарыгӡеит: Алиас Аҩӡба, Аслан Анқәаб, Мадонна Џьынџьалԥҳа.
