АҞӘА, лаҵарамза 26 – Sputnik, Бадраҟ Аҩӡба. Ачемпионат аартра ҩышәҩык рҟынӡа аҟазарауаа алахәхоит, иҳәеит Амультимедиатә центра Sputnik Аԥсны аҟны имҩаԥысыз апресс-конференциаҟны ачемпионат аартреи аркреи рцеремониа арежиссиор Ҭимур Кәакәасқьыр.
"Ашьапылампыл азы ачемпионат аартреи аркреи рцеремониа хәҭа-хәҭала еилоуп. Арахь иаҵанакуеит аҭоурых, афольклор, аестрада, атеатр рыхәҭақәа. Дара дара еидҳәаланы ақәгылара ду аадырԥшуеит", — иҳәеит иара.
Лаҵарамза 28 рзы ачемпионат аартхоит. Лаҵарамза 29 рзы иалагоит ахәмаррақәа. Ахәмаррақәа мҩаԥысраны иҟоуп аҳҭнықалақь астадион "Динамо" аҟны. Мышкы ала имҩаԥысраны иҟоуп ахәмаррақәа ԥшьба. Рашәарамза 5 рзы афиналтә матч мҩаԥгахоит. Аицлабрақәа рҟны аиааира згаз акомандақәа аԥхьахәқәа ранашьара ацеремониа мҩаԥысуеит рашәарамза 6 рзы, ачемпионат алахәылацәа рыҩныҟақәа рыхынҳәра амшаз.
ConIFA Анагӡаратә еилакы аилатәараҟны, 2015 шықәса ԥхынгәы 8 рзы, еицҿакны рыбжьы рҭиит 2016 шықәса рзы адунеитә Чемпионат Аԥсны имҩаԥысырц.
